Кіраўнік «Адзінай Расіі» ў Маскве Андрэй Мяцельскі і яго сям'я валодаюць нерухомасцю агульным коштам $90 мільёнаў. Пра гэта ў сваім расследаванні паведаміў расійскі апазіцыянер Аляксей Навальны.
Паводле Навальнага, сям'я Мяцельскага з 2007 года купіла чатыры гасцініцы ў Аўстрыі, выдаткаваўшы на іх не менш за 40 мільёнаў еўра. Гатэлі зарэгістраваныя на яго маці Эльдзібіту Мяцельскую. Кампаніі сям'і дэпутата таксама займаюцца будаўніцтвам гатэльнага комплексу недалёка ад Павялецкага вакзала ў Маскве і элітнага жылога комплексу ў Ляфортава.
Ва ўласнасці ў членаў сям'і Мяцельскага, гаворыцца ў расследаванні, таксама ёсць некалькі элітных кватэр у Маскве і дзве дачы на Рублёўцы.
Сам Мяцельскі заявіў, што не мае дачынення да нерухомасці, пра якую гаворыцца ў расследаванні, і што яго маці-пенсіянерка купіла іх на законна заробленыя сродкі.
