Аляксандр Лукашэнка патрабуе максімальнай аддачы пры правядзенні ўборачнай кампаніі. Пра гэта кіраўнік дзяржавы заявіў сёння на рэспубліканскай селектарнай нарадзе па пытаннях уборкі ўраджаю, піша БелТА.
«Віды на ўраджай добрыя. Прагназуецца, што валавы збор па ўсіх культурах можа быць вышэйшы, чым летась. Таму ад усіх патрабуецца максімальная аддача, каб усё, што ёсць на палях, у канчатковым выніку апынулася ў засеках. Трэба задзейнічаць усе наяўныя рэзервы. З палёў мы павінны ўзяць 9,5 млн тон: і рапс, і кукурузу на зерне, і каласавыя, і грэчку, і проса. Менш нельга!» — падкрэсліў Аляксандр Лукашэнка.
Кіраўнік краіны адзначыў, што, нягледзячы на нядрэнныя ўмовы, цяперашняя ўборачная кампанія няпростая: пасевы ў большасці выпадкаў высакарослыя, маюць добрую шчыльнасць, аднак рэзка адрозніваюцца па ступені паспявання. «Уборка збожжавых у гэтым годзе, як мяне інфармуюць спецыялісты, пачалася на дзесяць дзён пазней чым звычайна. Значыць, асноўную ўборку варта завяршыць на працягу двух тыдняў, а за дваццаць дзён мы адназначна павінны скончыць уборку», — паставіў задачу кіраўнік дзяржавы.
Яшчэ адна складанасць, па яго словах, звязана з тым, што працы па ўборцы збожжавых па часе накладваюцца на другі ўкос траў і масавую сяўбу паржышчавых культур.
Кіраўнік дзяржавы таксама запатрабаваў забяспечыць жорсткі кантроль над нарыхтоўкай льнотрасты і льновалакна, а таксама вырошчваем рапсу.
«Рапс — гэта высокадаходная культура, вельмі рэнтабельная. Вы заўважылі, у Расіі шалёная гібель пчол у сувязі з тым, што пачалі высейваць у велізарных колькасцях рапс і не ў час апрацоўваць хімічнымі прэпаратамі. Глядзіце, каб у нас гэтага не паўтарылася, бо размова будзе вельмі кароткая», — папярэдзіў ён.
У селектарнай нарадзе бярэ ўдзел кіраўніцтва Адміністрацыі прэзідэнта, Савета міністраў, Міністэрства сельскай гаспадаркі і харчавання, Генпракуратуры, Міністэрства ўнутраных спраў, Камітэта дзяржаўнага кантролю. У абласных студыях на прамой відэасувязі з прэзідэнтам знаходзяцца губернатары, памочнікі кіраўніка дзяржавы ў рэгіёнах, а таксама намеснікі старшыняў аблвыканкамаў і Мінскага гарвыканкама, якія курыруюць пытанні сельскай гаспадаркі.
