Невядомы стрэліў у дарадцу-пасланца пасольства Беларусі ў Турцыі, ён шпіталізаваны. Пра гэта паведамляе турэцкая газета Hurriyet. Інфармацыю Tut.by пацвердзілі ў МЗС Беларусі.
«Супрацоўнік пасольства вяртаўся з дзіцем дадому, калі псіхічна неўраўнаважаны былы вайсковец некалькі разоў стрэліў у дыпламата», — распавёў афіцыйны прадстаўнік МЗС Беларусі Анатоль Глаз.
Дыпламат Аляксандр Паганшаў знаходзіцца ў шпіталі ў цяжкім стане, яму аказваецца дапамога.
Мужчына, які напаў, скончыў жыццё самагубствам.
Атака была здзейсненая адстаўным турэцкім вайскоўцам у раёне Чанкая, у якім размешчана вялікая колькасць дыпламатычных прадстаўніцтваў розных краін. Пасля нападу злачынец скончыў жыццё самагубствам. Паранены дыпламат быў дастаўлены ў бальніцу.
Як адзначае агенцтва Demiroren, мужчына, які напаў на дыпламата, быў яго суседам.