МАРГ не будзе перашкаджаць прыходу ў Беларусь шведскага рытэйлера IKEA. Пра гэта паведаміў першы намеснік міністра антыманапольнага рэгулявання і гандлю Артур Карповіч ў прэс-цэнтры БЕЛТА, адказваючы на пытанні журналістаў, паведамляе Звязда
«Цяжка вырашаць за вытворцу, ці будзе рытэйлер у нас у рэспубліцы ці не. Напэўна, інвестар заўсёды пралічвае варыянты, выгадна гэта яму ці не. Калі пралічыць, што выгадна, то перашкод з боку міністэрства ніякіх не будзе, — сказаў Артур Карповіч. - Я думаю, што гэтае пытанне будзе вырашана непасрэдна інвестарам».
Першы намеснік міністра таксама адзначыў, што і ўмоў па наяўнасці беларускай прадукцыі ў дадзенай сетцы ў выпадку яе прыходу на беларускі рынак таксама ніхто не ставіць. «Калі гэта фірмовы магазін, то ніякіх умоў па наяўнасці тавараў айчыннай вытворчасці ў прынцыпе не вылучаецца. Фірмовы магазін кіруецца сваімі правіламі», - растлумачыў першы намеснік міністра.
Раней паведамлялася, што сусветны гігант па продажы мэблі і тавараў для дома - шведская гандлёва-вытворчая група кампаній IKEA - плануе ў бліжэйшы год у два разы павялічыць закупкі ў Беларусі. За кошт гэтага айчынныя прадпрыемствы маюць намер рэалізаваць праз гэтую сетку прадукцыі на суму прыкладна 200 млн евро.
