Тэры Брэзьер
У бальніцы англійскага горада Лестэр пацыенту замест аперацыі на мачавым пухіры памылкова зрабілі абразанне, за што ён атрымаў кампенсацыю ў 20 тыс. фунтаў (каля $24 тыс.), піша bbc.com.
Летам мінулага года Тэры Брэзьер прыехаў у Лестэрскую бальніцу, дзе яму павінны былі ўкалоць планавую ін'екцыю ботаксу ў мачавы пухір.
Але нешта пайшло не так, і пасля працэдуры лекары сказалі: «Выбачайце, але мы вам зрабілі абразанне». Бальніца таксама прынесла «шчырыя і глыбокія прабачэнні».
«Я быў агаломшаны. Я не мог паверыць у тое, што мне казалі», - сказаў ён.
Інцыдэнт назвалі медыцынскай памылкай. Паводле мясцовага сайта Local Democracy Reporting Service, усяго ў бальніцы ў 2018 годзе было дапушчана восем памылак.
Пацярпелы вырашыў звярнуцца ў суд. Брэзьер распавёў: «У гэтым ёсць нешта пацешнае, але не будзем забываць і пра сур'ёзнае. З кім-небудзь магло здарыцца і горшае. Напрыклад, ампутавалі б не тую частку цела».
Галоўны лекар бальніцы Эндру Фурлонг заявіў: «Мы вельмі сур'ёзна падыходзім да падобных інцыдэнтаў. Было праведзена дбайнае расследаванне, каб атрымаць урокі і зрабіць усё магчымае і каб надалей не дапусціць паўтарэння падобнага. Хоць грошы не змогуць выправіць тое, што здарылася, але, мы спадзяемся, гэтая сума стане нейкай кампенсацыяй».
