Мужчына, які распачаў у ноч на мінулую нядзелю страляніну ў амерыканскім горадзе Дэйтан (штат Агаё), выяўляў цікавасць да «ідэалогій нянавісці». Пра гэта заявіў у аўторак прадстаўнік Федэральнага бюро расследаванняў (ФБР) Тод Уікерхэм, піша ТАСС.
«У часе расследавання мы выявілі сведчанні таго, што стралок вывучаў ідэалогіі нянавісці», - адзначыў ён. Пры гэтым Уікерхэм адмовіўся адказаць на пытанне, пра якія менавіта перакананні ідзе гаворка. Ён падкрэсліў, што «не мае намеру ў дадзены момант удавацца ў падрабязнасці, таму што мы знаходзімся на вельмі ранняй стадыі расследавання, нам трэба будзе атрымаць і вывучыць яшчэ вельмі вялікую колькасць матэрыялаў і доказаў».
ФБР разлічвае высветліць, ці паўплывала якая-небудзь з радыкальных ідэалогій на рашэнне злачынца распачаць страляніну. У ведамстве таксама маюць намер зразумець яго матыў і высветліць, ці мог хто-небудзь падштурхнуць яго на злачынства.
У суботу 21-гадовы белы мужчына адкрыў стральбу ў краме Walmart ў Эль-Паса (штат Тэхас). Загінулі 22 чалавекі, у тым ліку восем мексіканцаў, больш за 20 наведнікаў атрымалі раненні. Нападніка затрымала паліцыя. Напярэдадні ён змясціў у інтэрнэце «маніфест» з заклікамі «не дапусціць уварвання ў Тэхас» мексіканскіх імігрантаў.