У Новай Зеландыі падчас пасяджэння парламента адзін з спікераў няньчыў дзіця. Відэазапісам зацікавілася The Telegraph.
На кадрах бачна, што спікер парламента Трэвар Малард трымае на каленях нованароджанага. Ён гуляе з ім, корміць яго з бутэлечкі і пры гэтым удзельнічае ў дыскусіі. Мужчына вырашыў дапамагчы свайму калегу — Тамаці Кофі, які ў той момант выступаў з прамовай.
Малард таксама апублікаваў фота з немаўляткам у твітары і набраў сем тысяч лайкаў і паўтары тысячы рэтвітаў. Карыстальнікі ў каментарах адзначылі, што «гэта найлепшае, што яны бачылі за апошнія гады».
«Новая Зеландыя, вы, можа, і маленькая краіна, але ваш прыклад здольны натхніць ўвесь свет!», — напісаў адзін з іх.
Паведамляецца, што дзіця палітыку і яго партнёру Ціму Сміту нарадзіла сурагатная маці, але пры гэтым Тамаці Кофі з'яўляецца яго біялагічным бацькам. Іншыя члены парламента таксама пахвалілі мужчыну за тое, што ён прыйшоў разам з нованароджаным.
