Начальнік упраўлення інфармацыі і лічбавай дыпламатыі — прэс-сакратар МЗС Беларусі Анатоль Глаз, адказваючы на пытанні журналістаў, растлумачыў, чаму Беларусь будзе прадстаўлена на ўзроўні пасла на памятных мерапрыемствах з нагоды пачатку Другой сусветнай вайны 1 верасня ў Варшаве, перадае БЕЛТА.
Анатоль Глаз нагадаў, што некалькі дзён таму МЗС апублікавала сваю пазіцыю па гэтым пытанні, дзе выразна і ясна ўсё патлумачыла. «Тут не трэба займацца канспіралогіяй. Мы, безумоўна, удзячныя польскаму боку за запрашэнне. Але тэма Другой сусветнай, Вялікай Айчыннай войнаў для нас святая, і да яе ў нас заўсёды быў і застаецца празрысты і выразны падыход. Яшчэ раз падкрэслю, што ўсе без выключэння народы Савецкага Саюза ўнеслі вызначальны ўклад у агульную перамогу над нацызмам», — сказаў ён.
Прэс-сакратар МЗС яшчэ раз звярнуў увагу, што вызваленне Цэнтральнай і Усходняй Еўропы, канчатковы разгром нацызму на тэрыторыі Германіі сталі магчымыя дзякуючы гераічным намаганням шматнацыянальнай Чырвонай арміі.
«Трактаваць інакш, падзяляць уклад саюзных рэспублік у агульную перамогу як мінімум гістарычна няправільна. Пры гэтым у Варшаву не былі запрошаныя Казахстан, краіны Цэнтральнай Азіі, Расія», - падкрэсліў ён.
Разам з тым, улічваючы, што вайна з самага пачатку закранула тэрыторыю Беларусі, наша краіна прыняла рашэнне аб удзеле ў памятных мерапрыемствах. «Для нас удзел у памятных мерапрыемствах ў Варшаве 1 верасня — даніна памяці ўсім ахвярам пачатковага этапу Другой сусветнай вайны», — адзначыў Анатоль Глаз.
Нагадаем, што запрашэнне ўзяць удзел у памятных мерапрыемствах было накіравана Аляксандру Лукашэнку.
