Ахова птушак Бацькаўшчыны абвясціла птушку 2020 года. Гэта глушэц, паведамляе сайт ptushki.org.
Цікава, што глушэц вельмі нераўнамерна распаўсюджаны па ўсёй тэрыторыі Беларусі, але часцей сустракаецца ў паўночных раёнах і на ўсходзе. Гэта таёжны, паўночны від і ў сувязі са зменай клімату ён паступова паўсюль па Беларусі знікае. Асабліва катастрафічнае становішча цяпер на захадзе і поўдні краіны — у Белавежскай пушчы сто гадоў назад жылі сотні глушцоў, а цяпер ён тут амаль знік.
У Беларусі жывуць два падвіды глушца: заходнееўрапейскі і сярэднярускі. У спевах заходнееўрапейскага падвіду ёсць характэрны элемент «корак» («пробка»), таксама чорнае бруха амаль не мае белых плям, і ён больш буйны, чым усходняя раса. Колькасць заходнееўрапейскага падвіду нізкая: не перавышае 500 асобін.
Самка глушца
Глушэц — патрыёт, амаль усё жыццё можа пражыць у адным лесе. Гэтыя птушкі жывуць і гняздуюцца ў хвойных лясах паблізу мохавых балотаў. Увесну і ўлетку глушэц есць парасткі, кветкі, пупышкі, лісце, лясныя ягады, насенне і насякомых. Увосень птушкі кормяцца лісцем асін, ягадамі журавін, зімой — хваёвай ігліцай, пупышкамі. Птушанятам патрэбен бялок, таму ядуць у асноўным казурак і павукоў.
