Калектыўны зварот з просьбай перадаць Беларусі парэшткі аднаго з лідараў антырасійскага паўстання 1863 года Кастуся Каліноўскага разглядаўся 24 верасня на ўзроўні найвышэйшых асобаў Літвы, падзялілася са Свабодай канфідэнцыйнай інфармацыяй абазнаная крыніца.
«Подпісы, якія выклікалі рэзананс у беларускім грамадстве, — гэта толькі постфактум, — адзначыў літоўскі актывіст. — Неўзабаве з'явіцца таксама зварот ад групы літоўскіх парламентароў з аналагічнай просьбай: станоўча адказаць і перадаць Каліноўскага беларускаму боку».
Пра такія пляны літоўцаў расказваў і адзін з беларускіх палітыкаў.
Па словах суразмоўцы з Літвы, ідэя з пераездам парэшткаў Каліноўскага на радзіму была агучаная яшчэ на пачатку лета, неўзабаве пасля перамогі на прэзідэнцкіх выбарах Гітанаса Наўседы. Але толькі цяпер махавік закруціўся на поўную магутнасць.
За перапахаванне ў Беларусі выказаўся таксама літоўскі філосаф, прафесар Гінтаўтас Мажэйкіс, які бачыць у Каліноўскім сімвал незалежнасці Беларусі, асабліва важны ў кантэксце перамоваў з Расіяй аб «паглыбленні інтэграцыі».
Прадстаўнікі беларускіх уладаў пакуль не падпісвалі ліста і не выказваліся аб перапахаваньні.
Адпачатку ўрачыстая цырымонія перапахавання парэшткаў паўстанцаў плянавалася на Дзяды. Аднак з улікам новых ініцыятываў яе папярэдне аднеслі на 30 лістапада.