Кампанія Сяргея Цяцерына — аднаго з самых блізкіх да Аляксандра Лукашэнкі бізнесменаў — плануе пабудаваць шматфункцыянальны комплекс насупраць Палаца незалежнасці. Пра гэта TUT.BY расказалі некалькі крыніц.

Выява: ТМ-7.

Будынак прапануецца пабудаваць на месцы аўтастаянкі на скрыжаванні праспекта Пераможцаў і вуліцы Сапёраў — паміж заводам «Атлант» і ТРЦ «Замак». Як распавялі суразмоўцы партала, ініцыятарам будаўніцтва выступае група кампаній «БелГлобалСтарт» бізнэсмена і старшыні Беларускай федэрацыі тэніса Сяргея Цяцерына. У свой час менавіта ён далучыў Аляксандра Лукашэнку да тэнісу і стаў адным з самых блізкіх да кіраўніка дзяржавы людзей.

Што хочуць размясціць у будынку?

Як паведамляе агенцтва «Мінск-Навіны», перадпраектныя прапрацоўкі гэтага комплексу на мінулым тыдні ўхваліла архітэктурная рада ў сталічнай мэрыі. Эскіз будучага будынка прэзентаваў кіраўнік творчай майстэрні «ТМ-7» Анатоль Цэйтлін.

Паводле яго слоў, у комплексе будзе басейн, медыка-аднаўленчы цэнтр, грамадскае харчаванне і нумары для рассялення спартсменаў, якія прыязджаюць гуляць у вялікі тэніс, а таксама для дзяцей, якія будуць трэніравацца побач. Такім чынам, пры ўмове з'яўлення гэтага будынка, у гэтым раёне з'явіцца адзіны комплекс акадэміі тэніса, бо проста за ім размешчаны рэспубліканскі цэнтр падрыхтоўкі па тэнісе.

Як распавяла крыніца TUT.BY, у будынку прапануецца таксама размясціць офісныя памяшканні. Плошчы для федэрацыі тэніса мяркуецца падаць бязвыплатна, астатнія — здаваць у арэнду.

— Ініцыятыва [стварэння комплексу] ўжо дакладзеная кіраўніку дзяржавы, — дадае адзін з суразмоўцаў партала.

А што з архітэктурным абліччам?

Што тычыцца знешняга аблічча і параметраў комплексу, то архітэктары першапачаткова паставілі сабе наступныя абмежаванні: будынак не павінна быць вышэй за размешчаны побач ТРЦ «Замак», шкло на фасадзе максімальна прыбралі, каб не тыражаваць вобраз абрыдлых бізнес-цэнтраў.

Паколькі даўжыня будынка — 110 метраў, пастараліся зрабіць фасад неаднастайным, умоўна падзяліўшы будынак па вышыні на тры часткі, кожная з якіх адрозніваецца. Члены архітэктурнай рады адзначылі ўдалае горадабудаўнічае рашэнне, кампазіцыю і дынамічны фасад.

Ці былі ў Мінску падобныя праекты?

Так, былі. Па падобнай у нечым па сэнсе схеме нядаўна пабудавалі шматфункцыянальны комплекс за кінатэатрам «Перамога». Яго стварала кампанія, заснаваная структурай, звязанай з бізнэсмэнам Аляксеем Саўчуком і федэрацыяй гарналыжнага спорту. Адпаведна, у будынку размясціўся як офіс федэрацыі, так і памяшканні камерцыйнага прызначэння.

Адметна і тое, што кіраўніком гэтай кампаніі-забудоўшчыка быў экс-кіраўнік Палаца спорту і «Раўбічаў», а таксама гандбольны арбітр міжнароднага ўзроўню Міхаіл Маеўскі. А зараз ён з'яўляецца дырэктарам федэрацыі тэніса.

Чым займаецца «БелГлобалСтарт»?

У групу кампаній «БелГлобалСтарт» уваходзяць мадэлі, якія займаюцца ў асноўным гандлем і грамадскім харчаваннем. У прыватнасці - пастаўляюць у Беларусь спартовае харчаванне, кіруюць сеткай бараў «Блокбастар» і установай «Свабоды, 4», а таксама прадаюць мэблю і прадметы інтэр'еру. Акрамя таго, структуры Цяцерына зарабляюць на медыябізнесе.

Група кампаній таксама падтрымлівае развіццё тэніса і спансіруе шэраг спаборніцтваў.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру