Ігар Петрышэнка, фота Волі Афіцэравай
Афіцыйную беларускую дэлегацыю ўзначаліць віцэ-прэм'ер Ігар Петрышэнка, паведамляе на сваёй старонцы ў фэйсбуку МЗС Беларусі
«Некалі мы абяцалі Андрэю Горвату ды і яшчэ шмат каму сумленна зрабіць сваю працу па адным значным пытанні, растлумачыць і паведаміць аб выніках, — паведамляе МЗС. — Сёння ў МЗС Беларусі літоўскаму боку, які прадстаўляў пасол Літвы ў нашай краіне, былі афіцыйна перададзены вынікі экспертызы (у тым ліку ДНК) матэрыялаў з магчымага пахавання Віктара Каліноўскага ў Свіслачы. (…)
Сённяшняя перадача дазволіць параўнаць вынікі ДНК-экспертыз з Беларусі і Літвы, што неабходна для поўнай ідэнтыфікацыі магчымых астанкаў Кастуся Каліноўскага ў Вільні. Гарантыі, што перададзеныя астанкі належаць менавіта Віктару Каліноўскаму, мы даць не можам, але гэты шлях з навуковага пункту гледжання трэба прайсці да канца, гэта наш унёсак, таму лічым сваім абавязкам сумесна з літоўскімі калегамі працаваць над усталяваннем праўды. Любая, нават самая маленькая зачэпка можа апынуцца ключавой», — гаворыцца ў паведамленні.
«Мы ўдзячны літоўскаму боку за афіцыйнае запрашэнне Беларусі на ўрачыстую цырымонію перапахавання ўдзельнікаў паўстання 1863 года, якая адбудзецца 22 лістапада ў Вільні. Сумесная гісторыя патрабуе сумесных намаганняў. Рады, што такое разуменне ёсць у абодвух бакоў. З задавальненнем прынялі гэта запрашэнне. Дэлегацыю нашай краіны на мерапрыемстве ўзначаліць намеснік прэм'ер-міністра Ігар Петрышэнка», — адзначае МЗС..
