Кіраўнік Еўрапейскага банка рэканструкцыі і развіцця (ЕБРР) Сума Чакрабарці параіў Аляксандру Лукашэнку наведаць больш еўрапейскіх краін. Пра гэта банкір распавёў журналістам пасля сустрэч з кіраўніцтвам Беларусі, піша Tut.by
- На сустрэчы з прэзідэнтам Беларусі я сказаў пра яго паспяховы візіт у Аўстрыю (у лістападзе). Гэта адзначылі шматлікія назіральнікі, у тым ліку і ў Лондане. Я рэкамендаваў [Аляксандру Лукашэнку] разгледзець магчымасць наведаць іншыя дзяржавы як у Еўрасаюзе, так і за яго межамі, — сказаў Чакрабарці.
Таксама Чакрабарці параіў паспяхова правесці ў маі ў Лондане форум для замежных інвестараў па магчымасцях інвеставання ў Беларусь, а восенню ў Мінску — першае пасяджэнне Рады па замежных інвестыцыях пры прэзідэнце Беларусі.
— Было б няблага адправіцца на гэтыя сустрэчы і нешта заявіць, — сказаў Чакрабарці, маючы на ўвазе заключэнне здзелкі па ўваходжанні ЕБРР у капітал Белінвестбанка.
Варта адзначыць, што раней раду па замежных інвестыцыях планавалася правесці 7 лютага. Аднак, мяркуючы па ўсім, інвестарам не было чаго прадэманстраваць. ЕБРР у найбліжэйшыя тыдні плануе завяршыць перамовы з уладамі Беларусі аб набыцці пакета акцый Белінвестбанка, паведаміў Сума Чакрабарці.
— Мы спадзяемся, што гэта будзе максімальна збалансаваная ўгода. Будзе ўлічвацца, што гэта пілотная ўгода, якая стане прыкладам для ўсіх наступных, — сказаў прэзідэнт ЕБРР.
Галоўны эканаміст ЕБРР Беата Яворчык лічыць, што Беларусь «цяпер часта будзе згадвацца ў навінах».
— У Беларусі ёсць добрая магчымасць заявіць пра сябе, што вы адкрытыя да новага бізнэсу, новых інвестараў. Што вы гатовы запрашаць не па палітычных, а па выключна эканамічных меркаваннях, — сказала Яворчык. — Прамыя замежныя інвестыцыі (ПЗІ) трэба разглядаць не толькі як прыток капіталу, а прыцягненне ноу-хау, новых ведаў. Вопыт паказвае, што замежныя інвестары больш энергаэфектыўныя, чым іх калегі, якія прысутнічаюць у краіне.
