12 лютага двое маладых анархістаў атрымалі па 7 гадоў калоніі ўзмоцненага рэжыму. 19-гадовых Мікіту Емельянава і Івана Комара пакаралі за кіданне лямпачак з фарбай у сцяну Мінскага гарадскога суда і кактэйль Молатава, які яны кінулі ў будынак Валадаркі (але нічога не загарэлася).

Фота Н. Бужан

Пакаранне вельмі жорсткае, улічваючы яшчэ і сумы шкоды: пафарбаваць сцяну суда каштавала каля 150 рублёў, а пачысціць дзверы Валадаркі — увогуле 1,5 рубля.

Ці будуць праваабаронцы прызнаваць анархістаў палітвязнямі?

Прысуд пракаментаваў «вясновец» Валянцін Стэфановіч:

«Безумоўна, праваабаронцы яшчэ будуць абмяркоўваць гэты прысуд.

Але вось мая асабістая пазіцыя. Выказваць пратэст у такой форме, у якой зрабілі хлопцы, — то бок, кідаць кактэйль Молатава — учынак, у якім ёсць пытанне грамадскай небяспекі.

Але ёсць таксама пытанне прапарцыйнасці пакарання за ўчынак Комара і Емельянава. 7 гадоў за тое, што яны здзейснілі, улічваючы мінімальную шкоду… Працягласць зняволення відавочна неадэкватная і непрапарцыйная злачынству.

Таму ёсць падстава казаць пра палітычна матываваны характар пераследу, які выражаецца якраз у неадэкватнасці прысуду. Ёсць падстава патрабаваць перагляду прысуду з прытрымліваннем правоў на справядлівае судовае разбіральніцтва.

Кажучы проста, яны маглі б быць пакараныя без пазбаўлення волі.

Сітуацыя з Комарам і Емельянавым падобная да гісторыі з бабруйскімі анархістамі (Васьковіч, Сырамалотаў), якія атрымалі па 8 гадоў зняволення. Тады праваабаронцы палічылі, што палітычны матыў у суворым пакаранні быў. Нешта падобнае адбылося і сёння».

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру