У Мінску найбольш перасцергаюцца студэнты з краіны, якая найбольш пацярпела, — з Кітая. Фота Надзеі Бужан

Паўднёвая Карэя, Іран, Італія сталі галоўнымі агмянямі эпідэміі новага каранавіруса. Кітай запыніў эпідэмію, але якім коштам!

3 сакавіка Covid-19 працягвала паволі распаўсюджвацца па планеце. Расце і колькасць памерлых: гэта пераважна людзі старэйшага веку.

У Італіі колькасць выяўленых хворых перавысіла 2500. 79 з іх памерлі. 

У Іране зарэгістравалі больш за 2300 выпадкаў, 77 чалавек памерла.

У Карэі лічба заражаных перавысіла 5000, пры гэтым памерла толькі 34 чалавекі.

Затое ў ЗША паведамляюць пра 9 смяротных выпадкаў са 108 агулам адзначаных.

У Кітаі колькасць заражэнняў знізілася да найніжэйшага за паўтара месяца ўзроўню, але якім коштам! Краіна практычна на месяц спыніла прамысловасць і транспарт у многіх рэгіёнах.

Расце колькасць інфікаваных унутры Германіі (196) і Францыі (204).

Прэзідэнт Францыі Эманюэль Макрон паведаміў пра рэквізіцыю ўсіх запасаў медыцынскіх масак у аптэк і вытворцаў. 10 мільёнаў прафесійных масак ужо перададзены ва ўстановы аховы здароўя для раздачы, яшчэ 20 мільёнаў будуць дастаўлены па меры патрэбы. Акрамя таго, дзяржава праз паліклінікі раздасць 5 мільёнаў хірургічных масак пенсіянерам і людзям з клінічнымі хваробамі. Тым не менш, і ў Францыі гучаць нараканні на адсутнасць масак ва ўстановах аховы здароўя.

У той жа час каранцінныя захады, прынятыя ў краінах Еўрасаюза, не такія строгія, як у Беларусі. Гэтак, у Італіі толькі 60% пацыянтаў з выяўленым каранавірусам шпіталізаваныя. Усе, у каго лёгкія выпадкі, застаюцца дома. 2 з 18 інфікаваных у Каталоніі таксама застаюцца на каранціне дома. А ў Францыі пры выяўленні адзінага інфікаванага школьніка на каранцін распускаюць толькі яго клас. Тады як у Мінску цэлы Беларускі нацыянальны тэхнічны ўніверсітэт прыпыніў заняткі пасля выяўлення там адзінага студэнта-носьбіта.

У цэлым Сусветная арганізацыя аховы здароўя на сёння падае наступныя звесткі. Смяротнасць ад новага каранавіруса складае на сёння 3,4 % ад агульнай колькасці выяўленых выпадкаў. І гэта не пярэліўкі: у грыпу яна ў 30 разоў меншая. У той жа час новы вірус не такі заразны як грып, і каранцінныя меры паспяхова спыняюць.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру