Прадстаўнікі Украіны перадалі на сустрэчы трохбаковай кантактнай групы па ўрэгуляванні сітуацыі на ўсходзе краіны спіс асобаў для будучага абмену палоннымі, у ім значацца больш за дзвесце чалавек. Пра гэта ў эфіры Тэлерадыёкампаніі Турцыі распавёў прэзідэнт Украіны Уладзімір Зяленскі. Фрагменты інтэрв'ю выкладзеныя на яго афіцыйным сайце. Раней былы міністр замежных спраў Украіны Вадзім Прыстайка анансаваў, што гэта будзе апошні абмен у фармаце «ўсіх на ўсіх», піша Радыё Свабода.
Па словах Зяленскага, частка людзей са спісу ўжо мёртвыя. «Мы даведаліся імёны гэтых людзей, дзе яны знаходзяцца. Мы не ведаем, калі і з якіх рэгіёнаў мы вернем гэтых людзей, але мы, безумоўна, хочам гэтага. Некаторых катавалі, мы не ведаем, хто там ёсць. Але, на жаль, ведаем, што зможам вярнуць толькі целы некаторых з гэтых людзей», — сказаў ён.
