У выхавацеля дзіцячага садка і настаўніка сярэдняй школы ў Фрунзенскім раёне Мінска падазраюць каранавірус. Пра гэта ў рэдакцыю TUT.BY пішуць чытачы.
Каранавірусную інфекцыю падазраюць у адной з выхавальніц дзіцячага садка №398, паведамляюць бацькі. Сад знаходзіцца ў Фрунзенскім раёне Мінска на вуліцы Цімашэнкі.
— Сёння раніцай каля 7.30 нам патэлефанавала другая выхавацелька і папрасіла не весці дзяцей у сад, бо ў яе напарніцы выявілі каранавірус.
Па словах бацькоў, апошні раз выхавацелька была на працы ў пятніцу, 27 сакавіка, пасля чаго яна пайшла на бальнічны.
— Выходзіць, нашы дзеці — гэта кантакты першага ўзроўню, а мы — другога?
Напарніца ад каментароў адмовілася: «Усе пытанні да нашага кіраўніцтва».
Загадчыца дзіцячага сада Наталля Яўменава таксама не стала каментаваць сітуацыю.
— Усе пытанні — ва ўпраўленне па адукацыі ды санстанцыю, — кажа кіраўнік установы.
На пытанне, якія меры зараз прымаюцца ў садзе, яна адказала: «Якія ў нас мерапрыемствы ў краіне прапісаны — мыць рукі і праводзіць дэзынфекцыю, такія мы і робім».
У сярэдняй школе №179 на вуліцы Ляшчынскага ў Мінску, па паведамленнях настаўнікаў, ужо каля трох тыдняў хварэе на пнеўманію калега, а таксама два тэхнічныя работнікі. Але пра тое, што ў іх каранавірусная інфекцыя, ніхто не казаў і не паведамляў.
Аднак 1-га красавіка настаўнікі атрымалі паведамленне ад дырэктара з просьбай прыйсці ў настаўніцкую, захапіўшы з сабой асадкі, і напісаць заявы, каб не хадзіць на працу да панядзелка.
— З чаго б раптам нам пісаць заявы з-за пнеўманіі ў калегі?
Дырэктар школы Яўгенія Кацар распавяла, што школа працуе ў штатным рэжыме, а інфармацыяй пра выпадкі захворвання яна не валодае.
Датэлефанавацца ва ўпраўленне па адукацыі Фрунзенскага раёна і атрымаць каментар не ўдалося.
