У Мінску дастаткова рэсурсаў, каб забяспечваць бяспеку падчас правядзення кампаніі па зборы подпісаў у падтрымку кандыдатаў у прэзідэнты і змагацца з правакацыямі. Пра гэта заявіў мэр Мінска Анатоль Сівак у эфіры БТ.
«Гэта не працэс агітацыі, калі збіраюцца мітынгі і ідуць абмеркаванні, выказваюцца меркаванні, гэта просты працэс збору подпісаў: падышоў, распісаўся і далей жывёш, працуеш», — сказаў Сівак.
Аднак мэр заявіў, што ў сталіцы ўсё ж знаходзяцца людзі, якія нібыта адмаўляюцца разумець, чым з'яўляецца працэс збору подпісаў.
«Яны гэты працэс збору подпісаў адмыслова выкарыстоўваюць для таго, каб праводзіць нейкую агітацыю. Прычым былі такія заявы, каб праводзіць такую агітацыю не за сябе як за кандыдата, а проста, напэўна, каб навязаць сваю пазіцыю, зладзіць нейкую дэманстрацыю, часам праходзяць на грані фолу сваркі. На гэтым этапе мы будзем прымаць рашэнні, каб гэтыя правакатары не з'яўляліся ў такіх месцах», — запэўніў Анатоль Сівак.
