Фота Надзеі Бужан
Дзяржабвінаваўца запатрабаваў для экс-намесніка дзяржсакратара Рады бяспекі, кіраўніка Службы бяспекі прэзідэнта Андрэя Уцюрына пакаранне ў выглядзе 14 гадоў пазбаўлення волі, піша БелТА
Па сукупнасці злачынстваў пракурор запатрабаваў прызначыць Уцюрыну 14 гадоў пазбаўлення волі ў калоніі ўзмоцненага рэжыму. Акрамя гэтага, пазбавіць яго звання палкоўніка.
«Абвінавачаны на судзе заявіў аб прызнанні сябе вінаватым. Фактычна сваю віну ў атрыманні хабару і падбухторванні да дачы хабару не прызнаў», - сказаў дзяржабвінаваўца.
На судзе Уцюрын не адмаўляў факт атрымання $ 9 тыс. і $140 тыс., аднак казаў, што размова ідзе пра пазыку. «На працягу ўсяго папярэдняга следства Уцюрын паказанняў аб атрыманні пазыкі ад Гарбачова не даваў», - указаў дзяржабвінаваўца.
Паводле пракурора, Уцюрын не раскаяўся ва ўчыненым злачынстве. Абцяжарваючай акалічнасцю пракурор прапанаваў лічыць парушэнне Уцюрыным прысягі.