Пра гэта паведаміла ў фэйсбуку менеджарка праекта Валянціна Андрэева:
«Банк ясна адказаў: сабраныя на выданне кнігі грошы выдавецтву не пералічаць. Таму просім вас больш не пераводзіць грошы на выданне кнігі».
11 чэрвеня рахункі кампаніі «ХайвПроджэкт», якая займаецца праектамі «Вулей» і MolaMola, былі заблакаваныя. 13 ліпеня Белгазпрамбанк адказаў выдавецтву, што нават у выпадку паспяховага завяршэння збору сродкаў разлічыцца з выдавецтвам будзе немагчыма.
Зборам грошай кнігі «100 манет ВКЛ» займалася выдавецтва «Тэхналогія». На 15 ліпеня з замоўленых 10 900 рублёў фундатары сабралі 7400. Аўтары альбома — даследчыкі нумізматыкі Дзмітрый Гулецкі і Мікалай Дарашкевіч.
Чытайце таксама: У Маскве выходзілі грошы з «Пагоняй»
«Мы вельмі ўдзячныя тым, хто сабраў для выдання такую суму. Але на сёння мы проста папрасілі людзей больш не фінансаваць выданне, — патлумачыла «Нашай Ніве» Валянціна Андрэева. — Праект будзе непаспяховы, і банк проста верне фундатарам грошы на карткі (гэта закладзена ў нашай дамове)».
Валянціна расказвае, што ўвосень збор плануюць пачаць зноў. Магчыма, фундатарам прапануюць рабіць перадзамовы на сайце «Тэхналогіі».
