Здарэнне адбылося сёння ўначы, паведамляе афіцыйны прадстаўнік МУС Вольга Чамаданава ў сваім тэлеграм-канале.
У Салігорскі РАУС каля 03:40 паступіла інфармацыя: з АЗС скралі таксі. Пакуль кіроўца разменьваў грошы, нецвярозы 40-гадовы пасажыр скарыстаўся тым, што ключы засталіся ў замку.
Супрацоўнікі ДАІ пачалі пераслед «Рэно Логан». Каля 4:15 на 98-м км дарогі Мінск — Мікашэвічы паблізу в. Васілінкі ўгоншчык не справіўся з кіраваннем.
Мужчына наехаў на дарожную агароджу на раздзяляльнай паласе. Машыну адкінула на патрульны аўтамабіль, пасля чаго «Рэно Логан» загарэўся.
Кіроўца памёр на месцы здарэння, супрацоўнікі міліцыі не пацярпелі.
