Як паведамляе карэспандэнт НН, у Слоніме пры ўваходзе на стадыён «Дынама», дзе адбываецца сустрэча са Святланай Ціханоўскай, перад яе пачаткам выстраілася чарга з людзей, даўжынёй у сто метраў. Міліцыя пры турнікетах працуе марудна.
Улады адвялі для сустрэчы напаўзакінуты стадыён «Дынама» ў прамзоне з гігантамі-камінамі, але там сабралася 2000 чалавек.
Бачная была непадробная народная любоў да Святланы Ціханоўскай. «З табою Бог!», «Мы цябе любім!» — крычалі людзі, калі Ціханоўская пачала выступ. Калі яна расказала пра тое, што мусіла вывезці дзяцей з Беларусі, жанчына з двума дзецьмі ў натоўпе заплакала.
Таксама ў кожным горадзе Ціханоўскай прысылаюць цыдулкі з асабістымі прызнаннямі. «Добра, што ёсць муж. А то ў кожным горадзе прыхільнікі, не ведала б дзе асесці», — аджартоўвалася Святлана.
У Слоніме ёй падаравалі вялікую шакаладку з надпісам «Прэзідэнт». Ціханоўская паабяцала, што, калі стане прэзідэнтам, прыедзе ў Слонім і з'есць яго разам з тым, хто падарыў.
