Прэс-сакратар мінскага «Дынама» Раман Шаўцоў пацвердзіў pressball.by сыход з клуба. Раней з дынамаўцамі расстаўся начальнік упраўлення маркетынгу і сувязяў з грамадскасцю Раман Стронгін.
Абодва супрацоўнікі напісалі заяву аб звальненні «па пагадненні бакоў», не пагадзіўшыся (па меркаваннях асабістага характару) з просьбай кіраўніцтва асвятліць удзел каманды ў датэрміновым галасаванні на выбарах прэзідэнта, а прэс-службе зняць агітацыйны ролік.
Хакеістам прапанавалі прагаласаваць датэрмінова у пятніцу, 7 жніўня.
Раман Шаўцоў. Фота «Прэсбол»
Кіраўніцтвам «Дынама» заява Шаўцова была задаволена.
Раман Шаўцоў — вядомы беларускі журналіст, які працуе ў жанры рэпартаж, аўтар блога і тэлеграм-канала «Ваўка ногі кормяць». Да пераходу ў «Дынама» Шаўцоў працаваў у кампаніі «Спорт-пары», а таксама прэс-сакратаром клуба «Крумкачы».
Раман Стронгін. Фота belarushockey.com
Стронгін таксама палічыў для сябе немагчымым выканаць распараджэнне кіраўніцтва і напісаў заяву на звальненне. Заява была задаволена.
У спартыўнай журналістыцы Стронгін працуе з 1999 года. Да прыходу ў «Дынама» асвятляў хакей на СТБ, з'яўляўся аўтарам і вядучым праграм «Гарачы лёд» і «Прафесійны бокс».
