Аляксандр Лукашэнка, а следам за ім і чыноўнікі з ідэолагамі, ужо некалькі тыдняў паўтараюць як мантру словы аб тым, што пасля выбараў у Гродзенскай вобласці сталі вывешваць польскія сцягі.

«Вядома, мы ніколі не будзем мірыцца з тым, што ў Гродне вывешваюць польскія сцягі на балконах і ўжо ў адкрытую заяўляюць: пры распадзе Беларусі Гродзенская вобласць адыдзе Польшчы. Ды нікуды яна не адыдзе», — казаў Лукашэнка.

«Наша Ніва» распытала ў вядомага журналіста, актывіста незалежнага Саюза палякаў Андрэя Пачобута, ці сапраўды ў Гродне і вобласці сталі вывешваць «бяла-чырвоныя» сцягі. Андрэй — сам жыхар Гродна і ў справах вобласці арыентуецца добра.

Андрэй Пачобут. Фота Хартыя-97.

«НН»: Польскія сцягі ў жніўні сапраўды былі заўважныя ў Гродне?

Андрэй Пачобут: Польскі сцяг даўно вісіць над будынкам польскага консульства ў Гродне. Працягвае вісець і цяпер. Больш ні на адным адміністрацыйным ці прыватным будынку не было. Я спецыяльна пра гэта даведваўся. Адзін ідыёт з гродзенскімі каранямі піша, што над тым ці іншым пад’ездам вісеў польскі сцяг, сталі высвятляць, нічога такога і блізка няма. Тое самае магу сказаць і пра вобласць. Адмыслова даведваўся — нідзе ніхто польскіх сцягоў не вывешваў. Гэта я магу сказаць дакладна.

У Гродне над тэатрам быў вывешаны бел-чырвона-белы сцяг. Пасля гэтага і сталі гучаць словы пра польскія сцягі.

«НН»: Для чаго тады робяцца такія заявы вышэйшых чыноў?

АП: Лукашэнка спрабуе паказаць, што ён не прайграў выбары. Думаю, гэта гаворыцца з разлікам на Пуціна і Расію, а таксама на невялікую групу (мы цяпер дакладна ведаем, што гэта невялікая група) ягоных прыхільнікаў. У Гродзенскай вобласці вялікая частка людзей бывала ў Польшчы, яны ўсе глядзяць на гэта як на лухту. Аднак я вось быў на праўладным мітынгу ў падтрымку Лукашэнкі, і там казалі, што Гродзенскую вобласць ужо падзялілі між Польшчай і Літвой, што нібыта так сказала Ціханоўская.

«НН»: Андрэй, вы добра знаецеся ў польскіх палітычных колах. Такія настроі — далучыць Гродзенскую вобласць да Польшчы — там сапраўды ёсць?

АП: Гэта нейкая фантасмагорыя, вядома. У Расіі папулярная ідэя перагляду межаў, таму яны экстрапалююць сваё бачанне на астатніх. Але ў Польшчы такой патрэбы няма.

Наколькі я ведаю, размовы пра «далучэнне» Гродзеншчыны да Польшчы пачаліся пасля таго, як рэдактар тыднёвіка «Найвыжшы час» (Najwyższy Czas) напісаў у твітары, што ў выпадку развалу Гродзенская вобласць павінна адысці да Польшчы. Гэты твіт выклікаў абурэнне ў Польшчы, яго папярэджвалі, што гэта працуе на расійскую прапаганду. Так і атрымалася. Аднак чамусьці ўсе маўчаць, што за «Найвыжшы час» такі? Гэта выданне, якое сімпатызуе Лукашэнку, Расіі, Пуціну, Кітаю.

Канечне, хапае розных ідыётаў, але гэта нават не маргіналы, а яшчэ менш істотныя асобы. Ніводная сур'ёзная палітычная сіла не выступае за далучэнне Гродзеншчыны, няма такой грамадскай думкі.

«НН»: Ці ўзмацніўся ціск на сябраў вашага Саюза палякаў пасля заяў Лукашэнкі?

АП: Мы ўжо вытрымалі розны ціск. І калі пачулі словы, то былі падрыхтаваныя да новага ціску. Некалькі нашых сяброў былі затрыманыя, але ў рамках агульных пратэстаў салідарнасці і супраць насілля. Мы гатовыя да любога развіцця падзей.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру