Ля МУС сабраліся больш за 50 журналістаў — патрабуюць сустрэчы з Караевым.
Міністр Караеў чакана да журналістаў не выйшаў. Гендырэктару Tut.by Людміле Чэкінай і галоўнаму рэдактару партала Марыне Золатавай, якія заходзілі ўнутр міністэрства, прапанавалі абскардзіць затрыманне калег праз пракуратуру.
Пазней затрыманы фатограф Tut.by Дзмітрый Брушко — невядомыя закінулі яго ў легкавік і з’ехалі.
Нагадаем, журналістаў Tut.by Надзею Калініну і Аляксея Суднікава, «Камсамольскай праўды» ў Беларусі» Мікіту Дубалеку, Марыю Эляшэвіч, Сяргея Шчогалева і журналіста БелаПАН Андрэя Шаўлюгу, затрыманых 1 верасня на акцыі ў Мінску, павезлі на Акрэсціна. Суд над імі працягнецца 3 верасня.
Журналісты былі затрыманыя ўвечары 1 верасня. Амаль суткі нашы калегі знаходзіліся ў РУУС Кастрычніцкага раёна. Ноч яны правялі ў актавай зале, спалі на крэслах. Іх справы разглядаў суд. Рашэнне па іх справах пакуль не прынята. Справы адпраўлялі на дапрацоўку.
Журналісты былі пазначаныя камізэлькамі і бэйджамі «Прэса». Аднак іх затрымалі ля стадыёна «Дынама» для праверкі дакументаў, а пазней склалі пратакол за ўдзел у «несанкцыянаваным мітынгу». Цяпер ім пагражае штраф або адміністрацыйны арышт да 15 сутак.
