З факультэта філасофіі і сацыяльных навук Белдзяржуніверсітэта звольніўся дацэнт, вядомы філосаф Павел Баркоўскі.

Павел Баркоўскі. Скрыншот з ютуба

«Тое, што адбываецца ў краіне, — гэта татальны рэжым гвалту і хлусні. Я не гатовы мірыцца з беззаконнем. Не гатовы мірыцца з тым, што ўніверсітэт здзяйсняе ціск на выкладчыкаў па палітычных матывах, як гэта здарылася са Святланай Воўчак», — заявіў дацэнт. Баркоўскі кажа, што звальняецца пад «ціскам уласнага сумлення».

«НН» атрымала афіцыйную пазіцыю БДУ наконт звальння супрацоўніка. Змяшчаем яе даслоўна.

Факультэт філасофіі і сацыяльных навук БДУ. Фота Волі Афіцэравай

«Справа не «ў сумленні», а ў страце аўтарытэту і адсутнасці шырокай падтрымкі. «Сумленне» — толькі шырма ад аб'ектыўных прычын звальнення.

Па-першае, Павел Баркоўскі сам пераканаўся ў сваім нізкім аўтарытэце сярод калег і адсутнасці падтрымкі яго грамадскай пазіцыі аб правядзенні забастовак у БДУ. Яго заклікі да забастовак не падтрымалі на кафедры і факультэце. Пра гэта ён сам заяўляе ў сваім відэазвароце аб прычынах яго звальнення.

Па-другое, студэнты не ўхвалілі яго рашэнне аб правядзенні забастоўкі ў шкоду навучальнаму працэсу. Гэта выявілася ў калектыўнай заяве чацверакурснікаў у дэканат ад 14 верасня з просьбай прызначыць іншага выкладчыка ў сувязі з няяўкай Паўла Баркоўскага на заняткі. Ён павінен быў весці ў гэтым семестры вучэбную дысцыпліну «Асноўныя напрамкі сучаснай філасофіі». Перадача курса ў памеры 125 гадзін іншаму выкладчыку азначала б невыкананне вучэбнай нагрузкі Паўлам Баркоўскім на стаўку.

Па-трэцяе, пераацэнены ўклад Паўла Баркоўскага ў філасофскую навуку, што ставіць пад сумнеў дарэчнасць у яго адрас эпітэта «выбітны філосаф». Рэйтынгавая пазіцыя Паўла Баркоўскага на факультэце склала 86-е месца з 115 супрацоўнікаў, па БДУ — 1208-е месца з 2255.

Рэйтынг аб'ектыўна адлюстроўвае ўклад выкладчыка ўніверсітэта ў вучэбную, навукова-метадычную, навукова-даследчую і арганізацыйную працу. Пачынаючы з 2015 года, згодна з Акадэміяй Google, h-індэкс цытавання Паўла Баркоўскага раўняецца двум».

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру