Група падтрымкі Вольгі Семчанка каля суда
У Магілёве асудзілі на сем дзён арышту загадчыцу літаратурна-драматычнага аддзела мясцовага драмтэатра Вольгу Семчанку, піша Радыё Свабода.
Трое з іх 33-гадовая жанчына ўжо адбыла ў ізалятары да суду. На разгляд справы яе не прывезьлі. Адміністрацыйны працэс у Ленінскім судзе праходзіў праз скайп.
Тыя, хто прыйшоў падтрымаць абвінавачаную, адрэагавалі на вырак судзьдзі Тацяны Касьцюк воклічам «Ганьба».
Вольгу Семчанку прызналі вінаватай ва ўдзеле 23 жніўня ў «несанкцыянаваным шэсьці». Паводле міліцэйскага пратаколу, яна рухалася ў калёне людзей, якія выгуквалі лёзунгі, несьлі апазыцыйную сымболіку, чым выказвалі нязгоду з вынікамі выбараў.
Сваю віну яна не прызнала. Даваць суду тлумачэньні адмовілася тлумачэньні, каб ня сьведчыць супраць сябе.
Судзьдзя не задаволіла ейнага хадайніцтва аб прадастаўленьні перакладчыка. Адмову патлумачыла тым, што ў Беларусі «дзьвюхмоўе». Без задавальненьня засталася просьба Семчанкі разглядзець справу ў будынку суда, бо відэатрансьляцыя праз скайп пастаянна перарываецца.
Тацяна Касьцюк адмовілася тлумачыць абвінавачанай, што такое «апазыцыйная сымболіка». Адвод судзьдзі таксама ня быў задаволены.
Доказамі віны Вольгі Семчанкі было відэа апэратыўнікаў з «Маршу свабоднай Беларусі». На ім падсудная сябе не пазнала праз «кепскую якасьць здымкаў». На відэа бачная калёна прыхільнікаў пераменаў зь бел-чырвона-белымі сьцягамі, але папярэджаньня міліцыі, што шэсьце несанкцыянаванае не чуваць.
Вольгу Семчанку схапілі 2 кастрычніка ў цэнтры гораду, непадалёк ад тэатру.
Пазьней зь Ленінскага аддзелу міліцыі патэлефанавалі знаёмцу затрыманай з просьбай забраць яе ровар. У судзе яна даводзіла: у яе з ужываньнем сілы ў міліцыі «выкралі» мабільны тэлефон, а пазьней заявілі, што ён арыштаваны, пакуль яна ня сплаціць штрафы за правапарушэньні. Зь міліцыі жанчыну адправілі ў ізалятар.
Аб вызваленьні Семчанкі без пакараньня ў пракуратуру і суд зьвярталіся акторы тэатру, якія даводзілі, што яе адсутнасьць на працы парушае ўзаеміны з замежнымі партнэрамі, а таксама ў рэклямаваньні пастановак. Прасілі вызваліць яе і ўдзельнікі клюбу беларускіх танцаў народных танцаў, якім яна кіруе.
Падтрымаць абвінавачаную прыйшло багата яе калегаў ды сяброў. На працэс, які праходзіў у кабінэце судзьдзі, трапіла толькі 12 чалавек. Астатнія чакалі судовага выніку ў калідоры.
