Фота: Алеся Белая.
У панядзелак, 2 лістапада, у Слуцку асудзілі двух дактароў, якія 1 лістапада выйшлі да плошчы з бел-чырвона-белым сцягам. Падтрымаць іх прыйшло больш за 40 чалавек. Суд правялі ў будынку РАУС, паведамляе Інфа-Кур'ер.
Нагадаем, што асудзілі Юрыя Акаёмава, траўматолага-артапеда, загадчыка траўматалагічнага аддзялення Слуцкай ЦРБ, і Юрыя Міхайлаўскага, лекара-хірурга. Іх абвінавацілі па частцы 1 артыкула 23.34 КаАП — «Парушэнне парадку арганізацыі або правядзення масавых мерапрыемстваў».
На судзе абодва доктара прызналі сваю віну цалкам. Пагадзіліся на разгляд справы без даследавання доказаў. Адвакатаў у іх не было.
Дактары сказалі, што выйшлі з бел-чырвона-белым сцягам, таму што гэты сцяг раней быў афіцыйным сімвалам нашай краіны, а цяпер — сімвал пратэсту.
Юрый Акаёмаў сказаў, што выйсці на акцыю іх заахвоціла нязгода з многімі дзеяннямі ўлады.
Паколькі дактары пагадзіліся не даследаваць доказы і прызналі віну, суд пастанавіў прызнаць іх вінаватымі.
Кожны з дактароў атрымаў штраф у 10 базавых велічынь (270 рублёў). Пасяджэнне працягвалася каля 15 хвілін.
Калі Юрый Акаёмаў і Юрый Міхайлоўскі выйшлі з будынка РАУС, група случчакоў, якая прыйшла падтрымаць іх, сустрэла дактароў авацыямі.
