Не менш як 381 чалавек быў затрыманы ў Беларусі ад мінулага панядзелка да нядзелі з палітычных матываў. Столькі імёнаў ведаюць праваабаронцы. (На папярэднім тыдні былі затрыманыя 433 чалавекі.)

Такім чынам, агульная лічба затрыманняў за час пратэстаў дасягнула 31 695.

Варта адзначыць, што гэтая лічба далёка не поўная. Затрыманых столькі, што ўлічыць усіх немагчыма. Нават агульная колькасць людзей, арыштаваных па крымінальных справах, пакуль дакладна невядомая, бо іх вельмі шмат.

На гэты момант вядома 582 чалавекі (праўда, гэты спіс па спасылцы таксама няпоўны, бо ўвесь час робяцца вядомыя новыя імёны), якія праходзяць па крымінальных артыкулах

— ад Сяргея Ціханоўскага і Віктара Бабарыкі да журналістак Кацярыны Барысевіч і Кацярыны Андрэевай і рабочых Жлобінскага металургічнага завода, дзе крымінальную справу завялі за забастоўку.

Агулам вядомых крымінальных спраў больш за 900. Не менш за 320 прадпрыемстваў і бізнэсаў трапілі пад эканамічныя рэпрэсіі за падтрымку пратэстаў.

На мінулым тыдні, акрамя Мінска, затрымлівалі людзей таксама ў Іўі, Брэсце, Смалявічах, Карэлічах, Салігорску, Магілёве, Гомелі, Маладзечне, Горках, Віцебску, Навагрудку, Наваполацку, Гродне, Баранавічах.

Класіка абсурду — выпадак у Горках. 7 снежня там быў затрыманы сельгасменеджар Андрэй Юркоў. 6 снежня ён правёў акцыю салідарнасці з адміністрацыйна арыштаванымі суайчыннікамі — адзіночны пікет з пустым аркушам ватмана. Відэа ён выклаў у сацсетку. 8 снежня Юркова выклікалі ў мясцовы РАУС, адтуль ён ужо не выйшаў.

Андрэй Юркоў быў затрыманы ў Горках за фота з чыстым аркушам паперы. Фота са старонкі Юркова ў фэйсбуку.

Можна з дакладнасцю сказаць, што гэта самыя масавыя палітычныя рэпрэсіі ў Еўропе за апошнія 40 гадоў.

Для параўнання: калі б у прапорцыі на душу насельніцтва столькі ж людзей затрымалі ў Расіі, гэта склала б 460 000. Калі б ва Украіне ці Польшчы — 125 тысяч.

Чытайце таксама: Татальны кантроль за аўтазакамі: як адзін з мінскіх раёнаў патрулюе тэрыторыю падчас нядзельных маршаў

Чытайце таксама: «У нашу кватэру ўвайшлі са стралянінай». Гісторыя жанчыны, чые абодва сыны сталі палітвязнямі

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру