Інцыдэнт адбыўся ў адной са школ Баранавіч у пачатку снежня падчас перамены. Пацярпелага — 14-гадовага хлопца — родныя адвезлі ў бальніцу. Яму спатрэбілася аперацыя, піша Intex-Press.

Пра здарэнне распавялі родныя школьніка. Хлопец вучыцца ў 9 класе.

Па іх словах, усё адбылося паміж урокамі ў адной са школьных распранальняў.

— Як мне распавёў Вадзім (імя школьніка змененае), у распранальні ён быў з іншымі хлопцамі. Да гэтага яны нібыта як палілі за школай электронныя цыгарэты, і калі настаўнік фізкультуры зайшоў у распранальню, ён убачыў у руках Вадзіма гэту прыладу для курэння, стаў лаяцца, затым пацягнуў за руку, каб выходзіў з распранальні, і пры выхадзе ўдарыў нагой дзіця ў пах, — распавядае бабуля пацярпелага.

Далей, па словах жанчыны, Вадзім самастойна з'ехаў дадому, нікому з родных і блізкіх нічога не распавёўшы.

— Толькі па тэлефоне, калі я датэлефанавалася да дзіцяці, ён распавёў аб здарэнні. Мой муж, яго дзядуля, адразу ж паехаў да яго і ўбачыў, што дзіцяці дрэнна. Адвезлі ў бальніцу, у прыёмным пакоі выклікалі ўролага, той сказаў, што ў дзіцяці разрыў правага яечка, гематома, і што трэба рабіць аперацыю, — успамінае гараджанка.

Родныя дзевяцікласніка звярнуліся з заявай у міліцыю і ў Следчы камітэт.

— Так, я разумею, што падлеткі цяпер складаныя. Могуць нешта і буркнуць ў адказ. Так што, прабачце, гэтак біць трэба?! — абураецца бабуля хлопца.

Аперацыя праведзена, школьніка выпісалі, але ён працягвае знаходзіцца на бальнічным.

— Доктар сказаў, што ўсё павінна быць добра. Гэта «павінна» трохі абурае. Не ведаю, як усё будзе далей. І ці не адаб'ецца ўсё гэта ў далейшым на яго маральным і фізічным стане — незразумела, — кажа бабуля. — Унук баіцца ісці назад у школу, думае, што з яго будуць кпіць. Хоць сябры часта яму тэлефануюць і пішуць, пытаюцца, як у яго самаадчуванне.

Завялі крымінальную справу па арт. 147 КК РБ («Наўмыснае прычыненне цяжкага цялеснага пашкоджання»).

Ва ўпраўленні па адукацыі Баранавіцкага гарвыканкама атрымаць аператыўны каментар наконт здарэння не ўдалося.

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзеру