Андрэя Комліка-Ямаціна затрымалі пасля ператрусу ў ягонай кватэры па арт. 342 КК, што праходзілі па ўсёй Беларусі ў праваабаронцаў, актывістаў, журналістаў. Вядома, што таксама ператрус адбываўся ў яго бацькі Ігара Комліка і ў офісе незалежнага прафсаюза РЭП.
На Андрэя склалі два адміністрацыйныя пратаколы: па арт. 23.34 і арт 23.4 КаАП. Артыкул за «непадпарадкаванне» з'явіўся пасля таго, як Ардрей адмовіўся адчыняць дзверы сілавікам. Таксама на яго склалі пратакол за пікетаванне на ўласным балконе: вывесіў серабрыста-бардовую гірлянду.
Справу разглядала суддзя Фрунзенскага раёна Марыя Ярохіна. Комлік-Ямацін распавёў, што да яго прыйшлі каля 7 раніцы, але ён не адчыніў дзверы, таму што не ведаў, што гэта міліцыя, таму сілавікі самі ўскрылі замок у дзвярах.
Суддзя Ярохіна арыштавала Андрэя на 25 сутак.
