Увечары 13 лютага на базе адпачынку «Огонёк» пад Смалявічамі, дзе праходзіў канцэрт РСП («Разбітае сэрца пацана»), Ok-Band і спявачкі Lear, затрымалі 68 чалавек. За гэтыя дні асудзілі ўсіх 59 чалавек, якіх даставілі ў жодзінскі ІЧУ да суда. Справы разглядалі суддзі Салігорска, Лагойска, Барысава і Жодзіна.
Усе атрымалі максімальнае пакаранне: 15 сутак або 30 базавых. У выніку 44 чалавекі будуць адбываць 15-суткавы арышт, а 15 чалавек былі аштрафаваныя на 30 базавых (870 рублёў).
Былі затрыманы цэлыя сем'і. Напрыклад, трое членаў сям'і Грыгаровічаў атрымалі па 15 сутак. Аляксей і Дар'я Аляксеевы сустрэнуцца толькі праз 15 дзён, як і Таццяна і Іван Котавы. А ў сям'і Пяхотаў дзве жанчыны атрымалі па 30 базавых, а двое мужчын па 15 сутак.
У выніку канцэрт каштаваў удзельнікам 660 сутак (1 год і 8 месяцаў) і 13 050 рублёў.
