Урад Латвіі ў аўторак на пасяджэнні прыняў рашэнне аб аднаўленні з 17 сакавіка авіязносін з трэцімі краінамі, якія былі забароненыя з пачатку пандэміі каранавіруса, у тым ліку будуць дазволеныя чартарныя рэйсы. Пра гэта паведаміў міністр транспарту Таліс Лінкайтс, піша ТАСС.
Пры гэтым захоўваецца ўмова аб забароне на ўезд у Латвію па неістотных прычынах з трэціх краін.
Мінтранс Латвіі раней выступіў з ініцыятывай аб аднаўленні міжнародных авіяпералётаў, матываваўшы гэта тым, што іншыя краіны, у тым ліку Літва і Эстонія, дазваляюць пасажырскія перавозкі. Таму на практыцы жыхары Латвіі ездзяць у трэція краіны, выкарыстоўваючы магчымасці транзіту праз суседнія дзяржавы.
Першы выпадак заражэння каранавірусам у Латвіі быў зафіксаваны 2 сакавіка 2020 года, у краіне выяўлена 90 997 інфікаваных, 1705 чалавек памерлі, на лячэнні ў бальніцах знаходзяцца 767 пацыентаў. Вакцынацыя ад каранавіруса ў краіне пачалася 28 снежня мінулага года, з тых часоў адну дозу прэпарата атрымалі 65 776 чалавек, дзве — 18 038.
