Фота pixabay.com

Тэхналогіі ўсё больш прысутнічаюць у нашым жыцці, і за час з пачатку пандэміі гэтая тэндэнцыя толькі ўзмацнілася. Але тэхналагічныя гіганты не адстаюць ад трэндаў эпохі. Яны прапануюць некалькі цікавых рашэнняў, якія павінны дапамагчы людзям праводзіць менш часу разам з гаджэтам.

Пачнём з кампаніі Microsoft і яе сэрвіса Microsoft Outlook, адна з функцый якога — планаванне мерапрыемстваў. Нядаўна ў сэрвісе з’явілася новая функцыя, якая дазваляе планаваць сустрэчы праз пяць хвілін пасля пачатку гадзіны, каб паміж імі атрымаўся невялікі перапынак. Такое новаўвядзенне — адказ кампаніі на вынікі яе ўласнага даследавання, якое паказала, што правядзенне віртуальных сустрэч без перапынку можа выклікаць у людзей стрэс, піша ВВС.

Нік Хедэрман, адзін з менеджараў брытанскага аддзялення Microsoft, тлумачыць, што рабіць перапынкі ад працы з гаджэтамі — фундаментальна важная рэч, бо гэта паляпшае нашу здольнасць канцэнтраваць увагу на працы. Што датычыцца віртуальных сустрэч, Хедэрман рэкамендуе скарачаць іх працягласць да 20-40 хвілін, а таксама ладзіць частку сустрэч у выключна галасавым фармаце і з магчымасцю для іх удзельнікаў прайсціся, каб змяніць абстаноўку і палепшыць фізічны стан.

Кампаніі Apple і Google таксама прапануюць інструменты для таго, каб больш свядома карыстацца гаджэтамі. У выпадку з Apple размова ідзе пра функцыю Screen Time, карыстальнікі Android у такім выпадку могуць скарыстацца аплікацыямі накшталт Digital Wellbeing. Гэтыя інструменты паведамяць карыстальнікам, колькі часу яны ўжываюць аплікацыі на тэлефоне і колькі паведамленняў яны атрымалі. Можна ставіць абмежаванні па колькасці часу, які вы плануеце правесці з гаджэтам, і па колькасці паведамленняў, якія вы жадаеце атрымліваць. Google нават распрацоўвае інструмент, які будзе нагадваць карыстальнікам не глядзець у тэлефон падчас шпацыру.

Тыя, каму гэтыя тэхналогіі не дапамагаюць, могуць перайсці на тэлефоны з мінімальным наборам функцый. Прыклад такога гаджэта — Light Phone, прылада, з якой можна толькі рабіць званкі і адсылаць паведамленні. Гэты тэлефон таксама мае дадатковыя функцыі, напрыклад магчымасць раздаваць Wi-fi, калькулятар і просты музыкальны плэер. Цікава, што падчас пандэміі продажы Light Phone моцна павялічыліся, бо людзі жадалі падчас лакдаўну адпачыць ад гаджэтаў.

Усё больш людзей разумеюць, наколькі важная магчымасць працаваць без перапынку і адцягвання ўвагі, у тым ліку на электронную перапіску. Але, вядома, не ўсе маюць такую магчымасць. Ёсць кіраўнікі, якія патрабуюць ад падначаленых адказваць на паведамленні як мага хутчэй, то-бок прынятая ў арганізацыі працоўная культура можа дрэнна ўплываць на здольнасць людзей канцэнтравацца на справе.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру