Дарадца прэзідэнта Літвы Аста Скайсгірыце і кіраўніца МУС Агнэ Білатайце сцвярджаюць, што Беларусь вядзе гібрыдную вайну з Літвой і аказвае на яе ціск.
«Апошнім часам беларускі рэжым значна павялічыў гібрыдны ціск на нашу краіну, адна з прыкмет такога ціску — павелічэнне колькасці нелегальных мігрантаў», — сказала Скайсгірыце.
«За мінулыя суткі мы затрымалі 52 нелегальных мігрантаў, за апошнія 5 месяцаў колькасць нелегальных мігрантаў павялічылася ў два разы, калі параўноўваць са звесткамі за мінулы год», — заявіла Білатайце.
«Для абароны мяжы ў нас ёсць усе неабходныя сродкі, у гэта ўцягнутыя ўсе ведамствы, мы кіруем сітуацыяй. Калі сітуацыя будзе складанай, калі яна пагоршыцца, у нас ёсць план А, Б і В. мы гатовыя да магчымых выклікаў», — заўважыла міністарка. Па словах Білатайце, згодна з планам прыкрыцця актывуюць і прыцягнуць войска, калі паток нелегальнай міграцыі значна вырасце. Яна згадала, што краіна імкнецца знізіць прывабнасць міграцыі. Цяпер большая частка мігрантаў, якія просяць прытулку ў Літве, пазней з'язджае на захад. Плануецца забараніць тым, хто просіць статус бежанца, на працягу пэўнага часу пакідаць тэрыторыю Літвы.
«Пакуль не высветляць асобу і не будуць выкананы іншыя працэдуры, рух не будзе дазволены», — сказала Білатайце.
Акрамя таго, паскораны працэс устаноўкі сістэм адсочвання на мяжы. Цяпер яны ахопліваюць 38% мяжы з Беларуссю. У 2022 годзе плануюць завяршыць устаноўку гэтых сістэм на ўсёй мяжы.
Паводле звестак сіл аховы дзяржаўнай мяжы, сёлета ў Літву з Беларусі спрабавалі патрапіць каля 250 мігрантаў, у асноўным грамадзян Ірака. Гэта ў 3 разы больш, чым за ўвесь 2020 год. У канцы мая Аляксандр Лукашэнка заявіў, што Беларусь дагэтуль спыняла «наркотыкі і мігрантаў» ля мяжы з Літвой, а пасля рэакцыі на пасадку самалёта ў Мінску і новых санкцый, больш не будзе гэтым займацца. «Вось цяпер самі будзеце іх лавіць», — сказаў ён.
