— Правядзенне міжнароднага мерапрыемства немагчыма ў краіне, дзе дзеячаў культуры і ў прынцыпе ўсіх нязгодных рэпрэсуюць, — цытуе частку ліста да Скалелы на старонцы ў Facebook БРК. — Да ўсяго адзін з арганізатараў фестывалю — Белтэлерадыёкампанія, якая паказвае ў сваім эфіры здзекі з палітвязняў. А дырэкцыя фэсту з гэтага года — кінастудыя «Беларусьфільм», структура Мінкульта, які выступае ў якасці жорсткага цэнзара ўсяго жывога ў беларускай культуры.
Крытычная пазіцыя Беларускай рады культуры абумоўлена сітуацыяй вакол фестывалю «Лістапад», якая склалася апошнім часам. Як паведамлялася раней, сёлета арганізатарам мінскага кінаагляду па рашэнні Міністэрства культуры з’яўляецца кінастудыя «Беларусьфільм». Цэнтр візуальных і выканальніцкіх мастацтваў «Арт Карпарэйшн», які займаўся кінафорумам апошнія дзесяць год і дзякуючы высілкам якога кінафорум і атрымаў пастаянную акрэдытацыю ў Міжнароднай федэрацыі асацыяцый кінапрадзюсараў FIAPF, застаўся па-за бортам.
На прэс-канферэнцыі СМІ, якая адбылася пазаўчора, генеральны дырэктар Нацыянальнай кінастудыі «Беларусьфільм» Уладзімір Карачэўскі агучыў тыя змены, якія напаткаюць «Лістапад». У прыватнасці, з праграмы фестывалю знікне Конкурс нацыянальных кінашкол, Нацыянальны конкурс, але дадасца конкурс Кіно маладых, у якім будуць спаборнічаць стужкі розных жанраў — дакументальнае, ігравое, анімацыйнае кіно, створанае аўтарамі да 40 гадоў.
У сваёй прамове гендырэктар таксама казаў пра тое, што задзейнічае фестываль як пляцоўку «для прасоўвання краіны, магчымасцяў супрацы з нашай краінай, магчымасцю здымак у нас, а гэтаксама прэзентацыі нашай уласнай прадукцыі».
Але галоўная навіна, якая канчаткова збянтэжыла кінасупольнасць — на фестывалі зменіцца, уласна, падыход да выбару карцін у асноўныя конкурсныя праграмы.
— Вядома, гэта ў першую чаргу мусяць быць фільмы, якія маюць узнагароды міжнародных фестываляў, але ў іх павінны падымацца тэмы гуманізму, захавання каштоўнасцяў, міру. Гэта павінна быць кіно, якое працуе на стварэнне, — цытуе словы Уладзіміра Карачэўскага БелТА. —
Мы не кажам пра тое, што забараняем тое ж сацыяльнае кіно, але разам з ім больш трэба казаць пра гуманізм і захаванне пэўных рэчаў, да якіх чалавецтва ішло тысячы гадоў.
Падобная «расплывістая» фармулёўка выклікала розгалас у кінаграмадскасці, якая ўбачыла ў словах гендырэктара кінастудыі намёк на звычайную цэнзуру.
Звярнуць увагу на тое, што зараз адбываецца з «Лістападам», і прапануе ў лісце да Міжнароднай федэрацыі асацыяцый кінапрадзюсараў Беларуская рада культуры.
Даты сёлетняга мінскага кінафестывалю — 20-26 лістапада.
