Гэта першае рашэнне з удзелам Беларусі ў інвестыцыйным арбітражы, вынік якога з'явіўся ў публічным доступе.
У 2017 годзе расійская кампанія ТАА «Манолиум-Процессинг» ініцыявала арбітражны разгляд супраць Беларусі на падставе Дамовы аб Еўразійскім эканамічным саюзе. Яна патрабавала кампенсаваць прамую шкоду і страчаную выгаду больш за 200 млн даляраў (пасля пазоўшчык зменшыў патрабаванні прыблізна да 176 млн даляраў), піша Радыё Свабода.
Сутнасць патрабаванняў зводзілася да таго, што ў 2003 годзе кампанія заключыла інвестыцыйную дамову з Мінскім гарвыканкамам на забудову зямельнага ўчастку ў цэнтры сталіцы. У якасці платы за атрыманне такога права да сярэдзіны 2011 года расіянам трэба было ўзвесці некалькі камунальных аб’ектаў.
Аднак, як тлумачыла сітуацыю Міністэрства эканомікі, шматлікія парушэнні з боку ТАА «Манолиум-Процессинг», выкліканыя «нядбайным стаўленнем да нацыянальнага заканадаўства», прывялі да таго, што інвестар страціў ранейшае права на будаўніцтва.
У 2014 годзе Эканамічны суд Мінска вынес рашэнне скасаваць інвестыцыйную дамову. Спрэчкі бакоў доўжыліся яшчэ працяглы час, хоць зямельны ўчастак ужо перадалі іншаму забудоўшчыку. Паводле расійскага боку, камунальныя аб’екты былі ўзведзеныя, а дзяржорганы адмовіліся выплаціць кампенсацыю выдаткаў.
Сёлета ў чэрвені склад арбітражу, створаны для разгляду гэтай справы, прызнаў у адпаведнасьцi з Дамовай аб Еўразійскім эканамічным саюзе толькі заявы пазоўшчыка, звязаныя з рашэннямі беларускіх судоў пасля 2015 года і перадачай зямельнага ўчастку ў раёне плошчы Перамогі іншаму інвестару (цяпер тут група А-100 узводзіць жылы комплекс «Дэпо»).
