«У дзевяностыя я ўпершыню сутыкнуўся з раманам Джорджа Оруэла «1984». Менавіта па-беларуску. Тады я з палёгкаю ўспрымаў гэта як мажлівую, але не ўмацаваную ў правах мінуўшчыну. Апошнія некалькі гадоў, яшчэ да 2020-га, я толькі гэты раман і круціў у галаве. Можа, гэта і ёсць праца майго жыцця.
Колькасць пачварных супадзенняў з рэчаіснасцю выбешвае, разбурае знутры, і разам з гэтым заклікае інстынкт самазахавання казаць гучнае НЕ», ‒ кажа Алег Гарбуз, выканаўца, рэжысёр і рэдактар праекта.
Купалаўцы лічаць, што прадстаўляюць «сапраўды эпічны праект». Гэта першая версія рамана Джорджа Оруэла на беларускай мове ў аўдыяфармаце. Пераклад — Сяргея Шупы, галасы — «Купалаўцаў».
Прэм’ера ў трох частках пройдзе цягам трох вечароў: 19, 20 і 21 снежня — на ютуб-канале групы. Пачатак у 19:00.
