Пачнём з пазітыву: Лілія і, па яе словах, іншыя эксперты з турыстычнай галіны мяркуюць, што будучы год будзе не горшы, чым складаны 2021-ы.

— Да снежня сфера турызму ў Беларусі, лічу, прыйшла хоць да нейкай стабільнасці: за два гады пандэміі і праблем з авіязносінамі вызначыліся напрамкі, па якіх беларусы могуць і хочуць лётаць. Мы лічым, што гэтыя маршруты застануцца найбольш запатрабаванымі і ў наступным годзе.

Самымі папулярнымі ў 2021 годзе ў нашых турыстаў былі:

  • Турцыя;
  • Егіпет;
  • Грузія;
  • ААЭ;
  • Мальдывы.

— У беларускі топ упершыню ўвайшоў люкс-напрамак — Мальдывы, — кажа эксперт. — Сёлета толькі ў першым паўгоддзі там адпачыла больш за тысячу беларусаў. Такога не было ніколі, усё ж кошт тураў даволі высокі. Падобна, што Мальдывы замянілі нам дарагія еўрапейскія напрамкі — туры ў Грэцыю, Італію і іншыя краіны.

Мальдывы. Фота: Unsplash / Rayyu Maldives

Эксперты лічаць, што калі ў нацыянальнага авіяперавозчыка будзе дастаткова самалётаў і калі для нас не адкрыюцца іншыя прывабныя напрамкі, то ў 2022 годзе беларусы будуць адпачываць у гэтых краінах яшчэ часцей — па папярэдніх прагнозах, аб'ём палётаў узрасце на 5-10%. Праўда, гэта ўсё адно дазволіць выйсці толькі на 40-45% аб'ёму дакавіднага 2019 года. З такім вынікам галіна яшчэ вельмі далёкая ад аднаўлення.

Усе напрамкі будуць расці з рознай хуткасцю, мяркуюць эксперты. Калі казаць пра працэнтны прырост, то лідарам павінна стаць Грузія, затым — Эміраты, Турцыя і Егіпет. Калі лічыць прырост у людзях, то больш за ўсё павінна прырасці Турцыя, затым — Егіпет, Грузія і Эміраты.

Для тых, хто можа дазволіць сабе экзотыку

— Далёкія напрамкі моцна залежаць ад эпідэмічнай сітуацыі ў канкрэтных рэгіёнах: некаторыя краіны часта адкрываюцца-закрываюцца, мяняюць правілы ўезду. Гэта, вядома, адпужвае турыстаў, у адрозненне ад тых жа Турцыі і Егіпта, якія два гады былі стабільныя па ўмовах ўезду, — тлумачыць Лілія Кобзік.

Папулярнымі ў 2022 годзе, лічыць эксперт, будуць:

  • Мальдывы;
  • Шры-Ланка;
  • Дамінікана;
  • Куба;
  • Танзанія (востраў Занзібар);
  • Тайланд і В'етнам (калі яны адчыняцца для турыстаў);
  • Мексіка;
  • Венесуэла.

— Венесуэла цяпер становіцца вельмі прывабным напрамкам. Яе востраў Маргарыта — жамчужына Карыбскага мора. 13 гадзін палёту з Масквы — і мы там. Гэта курортная сталіца краіны, на востраве асаблівыя ўмовы для турыстаў — у прыватнасці, максімальная ўвага надаецца пытанням бяспекі.

Востраў Маргарыта. Фота: worldatlas.com

Пытанні з пералётамі вырашаюцца (і пакуль будуць вырашацца) так: на далёкія кірункі беларусы лётаюць з дапамогай стыковачных рэйсаў Turkish Airlines і Flydubai.

Таксама нашы грамадзяне зноў сталі прыглядацца да вылетаў з Масквы.

Што будзе з палётамі з Беларусі

У другой палове 2021 года частку флоту «Белавія» давялося вярнуць лізінгадаўцам праз санкцыі, пад якія трапіў нацыянальны авіяперавозчык. Беларусам наогул будзе на чым лётаць на адпачынак?

— Да канца года эксперты тургаліны ўсё ж сыходзяцца ў меркаванні, што «Белавія» знойдзе выхад. Магчыма, з'явяцца расійскія барты — і на іх мы будзем лётаць у РФ. А тыя «Боінгі», што засталіся, паляцяць у іншых кірунках. Ці авіяпарк папоўніцца новымі самалётамі праз кітайскія ці расійскія лізінгавыя кампаніі… Увогуле, здаецца, фатальнага недахопу бартоў не будзе. На тую невялікую колькасць напрамкаў, якая ў нас засталася, хопіць. Проста цяпер, наколькі мне вядома, выкананню зімовых і вясновых праграм авіякампаніі «Белавія» нічога не пагражае.

Ці ўбачым Еўропу?

— Мы не ставім крыж і на Еўропе — калі, вядома, зноў не ўмяшаецца кавід, — кажа Лілія Кобзік. — Для турыстаў яна адкрываецца ўсё больш. Мы ўжо можам прыляцець у Іспанію, вакцынаваўшыся кітайскай Vero Cell ад Sinopharm, у Грэцыю або Чарнагорыю — з прышчэпкай «Спутнік V» і тэстам ПЛР. Туды мы лётаем з дапамогай Turkish Airlines. Такая магчымасць была і мінулым летам, але турыстам было нязвыкла: замест таго, каб вылецець з Мінска і праз пару гадзін прызямліцца ў Грэцыі ці Іспаніі, як гэта было пры непасрэдным злучэнні, даводзіцца доўга дабірацца са стыкоўкай. Але, думаю, беларусы прывыкнуць.

Падобна на тое, што паедзем у Расію

Эксперты лічаць, што ў 2022-м беларускія турысты зноў павернуцца ў бок Расіі.

— Мы перасталі масава разглядаць РФ у сферы турызму. Гады, а можа і дзесяцігоддзі, былі папулярнымі іншыя напрамкі. Але цяпер з'явіліся цікавыя прапановы — расце і попыт. Узімку ў беларусаў ужо запатрабаваныя сочынскія гарналыжныя курорты Красная Паляна і Роза Хутар. Улетку, думаю, вырасце папулярнасць адпачынку ў Сочы. Магчыма, да сезона туды пойдуць і аўтобусныя чартары — як раней вазілі ў Затоку або Адэсу.

Роза Хутар. Фота: sochi.com / Kirill Umrikhin

Круглы год беларусам даступныя экскурсійныя праграмы ў Маскву і Санкт-Пецярбург, варта разгледзець і туры па Залатым кальцы Расіі.

Тым, хто можа дазволіць сабе небюджэтны адпачынак, эксперт раіць вывучыць туры на Камчатку і Байкал.

— Расія мае велізарныя магчымасці для падарожжаў — і ў мінулым годзе расіяне сур'ёзна развярнуліся ў бок унутранага турызму. Такія экзатычныя туры вельмі дарагія, па цане супастаўныя з адпачынкам на Мальдывах, але выдаткі не марныя: пабываеш на Камчатцы раз у жыцці — запомніш назаўжды.

Камчатка. Фота: Pexels / Nadezhda Moryak

Ці адкрыюць наземныя межы?

Усю турсферу не пакідае надзея, што ў 2022-м для беларускіх турыстаў зноў адкрыюцца еўрапейскае неба і выезд праз наземныя межы, кажа Лілія Кобзік.

— Рашэнне сітуацыі з межамі жыццёва важнае для галіны. Іх адкрыццё для турыстаў дазволіла б хоць трохі аднавіць аўтобусныя маршруты — у кампаній, якія на іх спецыялізаваліся, цяпер вельмі цяжкая сітуацыя. Ды і для беларусаў, якія аддаюць перавагу аўтобуснаму турызму, гэта стала б выратаваннем.

Таксама балючае, асабліва для рэгіянальных турагенцтваў, пытанне — закрытыя межы з Украінай. Жыхары некаторых рэгіёнаў прывыклі лятаць праз Кіеў: і танней, і бліжэй, чым з Мінска. На жаль, кажа эксперт, многія туркампаніі закрываюцца — падобна, іх чакае доля аўтобусных фірмаў.

Але пакуль, прызнаецца Лілія Кобзік, чаканні не вельмі аптымістычныя.

Што будзе з падарожжамі па Беларусі

Эксперты прадракаюць ажыўленне ўязнога турызму — вядома, пакуль толькі з Расіі.

— Пад Новы год мы бачым сур'ёзны ўздым турыстычнай актыўнасці расіян не толькі ў беларускіх санаторыях — яны амаль увесь час прымалі людзей на аздараўленне і амаль не пацярпелі. Сёння ж адна з найбуйнейшых гасцініц Мінска запоўненая на навагоднія святы расійскімі экскурсантамі, і гэта вельмі добра.

Санаторый «Юнацтва». Фота: yunost.by

Дарэчы, па звестках сэрвісу для планавання падарожжаў OneTwoTrip, у адыходзячым годзе расіяне выдаткавалі на падарожжы па Беларусі $685 млн!

Планаваць нашта наконт уязнога турызму з заходняга напрамку эксперт пакуль не бярэцца:

— Мы не ведаем, якія будуць знешнія і ўнутраныя абставіны. У дачыненні да Расіі сёння прагназаваць лягчэй.

Што тычыцца папулярызацыі паездак па Беларусі для нашых суайчыннікаў, то эксперты турыстычнай сферы спадзяюцца, што ў краіне як мага хутчэй увядуць турыстычны кэшбэк. Такая дзяржпраграма ўжо дзейнічае ў Расіі, чакаецца, што хутка будзе прынятая і ў нас.

Як гэта працуе?

Турысты аплачваюць картай падарожжа па роднай краіне — і атрымліваюць вяртанне пэўнай сумы (у Расіі — 20%, у нас пакуль разглядаюць такую ж стаўку) ад кошту.

— Калі беларусы будуць зацікаўленыя і паедуць па краіне, гэта дапаможа трымаць у тонусе ўсе тыя аб'екты інфраструктуры, якія працуюць і сёння: гатэлі, гасцініцы, сядзібы, кафэ каля трасы. А калі адкрыюцца межы і мы зажывём ранейшым жыццём, у тым ліку і ў сферы турызму, нікому не прыйдзецца адкрывацца зноўку — усе будуць на плыву.

Што будзе з рэйсамі «Белавія» і цэнамі на квіткі, калі так шмат забаронаў?

Турысты забыліся аб Беларусі. Катастрафічныя лічбы афіцыйнай статыстыкі

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру