«Паглядзі на мяне! Вочы не адводзь, што ты вочы адводзіш?»

У 2017 годзе намеснік пастаяннага прадстаўніка Расіі пры ААН Уладзімір Сафранкоў груба адказаў на абвінавачванні ў падтрымцы прэзідэнта Сірыі Башара Асада.

У сваёй заяве Сафранкоў звярнуўся да прадстаўніка Вялікабрытаніі ў ААН Мэцью Райкрафта, называючы яго на «ты».

«Вы спалохаліся, сон страцілі, што мы будзем супрацоўнічаць са Злучанымі Штатамі. Вы гэтага баіцеся. Усё робіце для таго, каб гэта ўзаемадзеянне было падарванае… Паглядзі на мяне, вочы не адводзь, што ты вочы адводзіш?» — сказаў Сафранкоў Райкрафту.

«Ты сёння казаў, спадар Райкрафт, не па парадку дня пасяджэння, абражаў Сірыю, Іран, Турцыю, іншыя дзяржавы… Не смей абражаць Расію больш!» — дадаў ён.

Расійская інтэрнэт-супольнасць тады была агаломшаная хуліганскай рыторыкай расійскага дыпламата. У сваю чаргу, прыхільнікі віталі яго як узыходзячую зорку дыпламатыі.

У Крамлі выказванні дыпламата ўхвалілі. Прэс-сакратар Пуціна Дзмітрый Пяскоў заявіў, што было б горш, калі б Сафранкоў прадэманстраваў адсутнасць рашучасці.

«Нічога абразлівага сказана не было. Сапраўды, тэмы дыскусіі вострыя, яны часцяком тычацца сутнасці і будучыні міжнародных адносін. Праява мяккацеласці ў будучыні небяспечная наступствамі, таму лепш інтарэсы Радзімы адстойваць сёння», — сказаў Пяскоў.

Па словах афіцыйнай прадстаўніцы МЗС Расіі Марыі Захаравай, выказванні дыпламата былі крыкам адчаю.

«Адзін чалавек заклікае іншага адказаць: што вы робіце, пра што вы кажаце, як вам не сорамна, вы ўсведамляеце, куды вы заводзіце міжнародную супольнасць?» — каментавала Захарава.

«Дэбілы…»

Кіраўнік МЗС Расіі публічна выкарыстоўваў гэтае слова сама меней двойчы. 

«Дэбілы, бл****», — сказаў Лаўроў на прэс-канферэнцыі з міністрам замежных спраў Саудаўскай Аравіі Адэлем аль-Джубейрам у 2015 годзе. 

Хутчэй за ўсё, гаварыў Лаўроў гэта не самому міністру, а журналістам. Перад тым як вылаяцца, Лаўроў адказаў на пытанне расійскай журналісткі, якая спытала: «Як ідзе падрыхтоўка да шырокай сустрэчы па сірыйскім урэгуляванні?» Аднак, па словах міністра, нават сама пастаноўка такога пытання была некарэктная.

«Мы не плануем ніякую шырокую сустрэчу сірыйскай апазіцыі — гэта няправільная інфармацыя», — падкрэсліў дыпламат. Таксама пасля сваёй кароннай фразы Лаўроў зрабіў заўвагу людзям, што сядзелі ў зале: «Мы вам не перашкаджаем?»

Фраза стала легендарнай і хутка сышла ў народ. Паводле самай распаўсюджанай версіі, Лаўрова так раззлавалі фотакарэспандэнты, якія выбеглі перад ім і сталі фатаграфаваць. Праз год пасля гэтага выпадку расійскі міністр заявіў, што наогул ні на каго не злаваўся.

«Я потым глядзеў, я там спакойна сяджу. Ну, прабачце, не я адзін трапляю ў сітуацыю, калі думаюць, што мікрафон выключаны. Кэмеран, потым Абама таксама трапляў», — казаў Лаўроў.

Прэс-сакратар прэзідэнта Расіі Дзмітрый Пяскоў, адказваючы ў снежні 2016 года на пытанне вядучага НТВ: «Як бы вы пераклалі на вашу мову знакамітую фразу Лаўрова», адказаў: «Вядома, я б сказаў: «Казлы, н****!».

«Дэбілы — 2»

Праз год, у 2016-м, міністр замежных спраў Расіі Сяргей Лаўроў назваў аператара інфармагенцтва Reuters дэбілам. Гэта адбылося ў Гамбургу, дзе расійскі міністр знаходзіўся на сустрэчы Рады міністраў замежных спраў АБСЕ.

Праходзячы па калідоры, Лаўроў павярнуўся да камеры Reuters са словамі: «What do you want?» («Чаго хочаш?»). Адразу пасля гэтага міністр дадаў: «Дэбілы».

Афіцыйны прадстаўнік МЗС Расіі Марыя Захарава пазней заявіла, што Сяргей Лаўроў нікога не абражаў.

«Ён спытаў у аператара з уключанай камерай, чаго ён хоча, аператар нічога не сказаў і працягваў здымаць, міністр прайшоў сваім шляхам і нічога не казаў», — сказала яна.

«Who are you to f**king lecture me?»

Паводле брытанскай прэсы, 12 жніўня 2008 года падчас расійска-грузінскай вайны Лаўроў на сустрэчы з кіраўніком брытанскага МЗС Мілібэндам сказаў «Who are you to f**king lecture me?» («Хто ты такі, каб чытаць мне, б****, натацыі?!»).

Але, па словах Лаўрова, ён не абражаў Мілібэнда, і цытату журналісты перадалі няправільна. Лаўроў сказаў пазней: «Ядранае слоўца я ўжыў не ад сябе ў яго адрас, а цытуючы аднаго нашага калегу, які напярэдадні прыляцеў з Тбілісі».

Па словах Лаўрова, дыпламат, што прыбыў з Тбілісі, сказаў расійскаму міністру: «Я толькі што з Тбілісі, Саакашвілі нейкі «f**king lunatic» («******* лунацік»).

«Вось дзе гэтае слова было вымаўленае. А Мілібэнд спрабаваў пераканаць мяне, што з Саакашвілі трэба дамаўляцца», — сказаў пазней Лаўроў журналістам.

«Вы што, маці Тэрэза?»

Скандальнымі выказваннямі адзначыўся і прадстаўнік Расіі ў ААН, нябожчык Віталь Чуркін.

Арабскія СМІ сцвярджалі, што расійскі дыпламат пагражаў Катару.

«Калі вы яшчэ раз загаворыце са мной у такім тоне, такой рэчы, як Катар, пасля сённяшняга дня больш не будзе», — нібыта адказаў Чуркін прадстаўніку Катара за крытыку блакавання Расіяй рэзалюцыі Рады Бяспекі ААН па Сірыі.

«Асабліва дзіўным мне падалося выступленне прадстаўніка Злучаных Штатаў, якая пабудавала сваё выступленне, як быццам яна маці Тэрэза», — казаў Чуркін былому пастаяннаму прадстаўніку ЗША пры ААН Саманце Паўэр, якая абвінавачвала Расію ў ваенных злачынствах у Сірыі.

Захарава параўнала прэзідэнта Сербіі з гераіняй фільма «Асноўны інстынкт»

Афіцыйная прадстаўніца МЗС Расіі Марыя Захарава справакавала дыпламатычны скандал, апублікаваўшы на сваёй старонцы ў Facebook допіс, у якім высмеяла сустрэчу прэзідэнтаў Сербіі і ЗША Аляксандра Вучыча і Дональда Трампа.

4 верасня Вучыч сустрэўся з Трампам у Вашынгтоне. Адну з фатаграфій з гэтай сустрэчы пракаментавала Марыя Захарава. Яна параўнала перамовы ў Белым доме з допытам, размясціўшы фатаграфію сустрэчы Вучыча з Трампам побач з кадрам з фільма «Асноўны інстынкт».

«Калі вас паклікалі ў Белы Дом, а крэсла паставілі так, быццам вы на допыце, сядайце як на фота #2. Кім бы вы ні былі. Проста паверце», — напісала прадстаўніца расійскага МЗС.

Публікацыя выклікала крытыку з боку Сербіі. Прэзідэнт краіны назваў параўнанне прадстаўніка расійскага МЗС «прымітывізмам» і нагадаў, што Сербія была адзінай краінай, якая не ўвяла санкцыі супраць Расіі.

«Падсвядомасць больш за ўсё кажа пра чалавека, больш за ўсё пра сябе сказала Марыя Захарава, прымітывізм і спрошчанасць больш за ўсё кажуць пра яе і пра тых, хто гэта апублікаваў. Я пра гэта казаць не буду, хай яны самі гэтым займаюцца», — сказаў Аляксандр Вучыч у эфіры сербскага тэлеканала Pink-TV.

«Не цэняць, што Сербія — ваенна нейтральная краіна і не збіраецца ўступаць у НАТА, адзіная краіна, якая купляе газ і зброю ў іх, я не буду тлумачыць чужы прымітывізм», — адзначыў Вучыч.

Пазней сербскае МЗС запрасіла расійскага амбасадара «для дачы вусных тлумачэнняў». У вырашэнне сітуацыі ўключыўся кіраўнік МЗС Расіі Сяргей Лаўроў.

Сама Захарава пазней прынесла прабачэнні.

«Прашу прабачэння, але мой допіс няправільна зразумелі! Адзінае, што ў ім змяшчалася, — непрыманне напышлівага стаўлення з боку «выключных». Пратакольныя хітрыкі сталі адным з прыёмаў, на якія рэгулярна ідуць амерыканскія чыноўнікі, каб штучна стварыць бачнасць уласнай выключнасці. А гэта непрымальна», — патлумачыла яна.

«Рэспубліканцы перамаглі, дзякуючы яўрэям»

Скандал з Захаравай быў не адзіны. У 2016 годзе ў эфіры расійскага тэлебачання яна заявіла, што перамога рэспубліканцаў у ЗША адбылася, «дзякуючы яўрэям».

«Калі ты хочаш даведацца, што будзе ў Амерыцы, трэба з кім размаўляць? Трэба размаўляць з яўрэямі, натуральна. Ну само сабой! Яны мне сказалі такую рэч: «Марачка, разумееце, мы, вядома, дамо Клінтан. Але рэспубліканцам мы дамо ў два разы больш». Усё! Пытанне было закрытае асабіста для мяне!» — сказала Захарава, крыўляючы яўрэйскі акцэнт.

Яшчэ адзін скандал на амерыканскую тэматыку з удзелам Захаравай — яна сцвярджала, што бін Ладэна прымалі ў Белым доме.

«Успомніце гэтыя фантастычныя, феерычныя фатаграфіі, як у Белым доме прымалі бін Ладэна. Гэта ж класічны лабізм у самым дакладным сэнсе гэтага слова», — казала Захарава ў 2017 годзе.

Фатаграфій у эфіры не паказалі. Аказалася, што Захарава гаварыла пра фальшывую выяву, якую распаўсюджвалі прыхільнікі Дональда Трампа. 

«Як сыр ракфор — такі трохі смярдзючы»

Падчас нядаўняга брыфінгу па выніках першага раўнда перамоваў паміж Вашынгтонам і Масквой па так званых «гарантыях бяспекі для Расіі» намеснік кіраўніка МЗС Расіі Сяргей Рабкоў паспрачаўся з журналістам Bloomberg і параўнаў амерыканскае агенцтва са смярдзючым сырам.

Журналіст заявіў, што для Bloomberg «важныя не рэйтынгі, а важная эканамічная інфармацыя, неабходная інвестарам».

Па словах журналіста выдання, агенцтва паведамляе, як інфармацыю з Амерыкі, так і з Расіі.

У адказ на гэтую рэпліку Сяргей Рабкоў пацікавіўся ў журналіста, адкуль яму вядома, што неабходна інвестарам. Ён выказаў сумнеў, што выданне аб'ектыўна праводзіць адпаведныя даследаванні.

«Bloomberg перадае амерыканскую пазіцыю ў яе мэйнстрымным выкладзе і фрагментарна дае расійскую пазіцыю: калі гэта зручна альбо калі гэта можа сказіць… Ведаеце, як сыр ракфор — такі злёгку смярдзючы. Вось чым займаецца Bloomberg, падаючы расійскую пазіцыю», — заявіў намеснік міністра замежных спраў Расіі.

«НАТА трэба збіраць манаткі»

Расія пры адсутнасці дамоўленасцяў па гарантыях бяспекі можа звярнуцца да іншых сродкаў для забеспячэння балансу сіл і «застрашвання апанентаў», заяўляў той самы Рабкоў.

«Мы будзем вымушаныя пры адсутнасці неабходных і тэрміновых дамоўленасцяў па прававых гарантыях выкарыстаць іншыя сродкі для забеспячэння патрэбнага балансу, калі хочаце, для застрашвання апанента — не ў плане стварэння нейкіх пагроз, а ў плане стрымлівання», — сказаў ён.

НАТА больш не зможа «адціскаць» Расію, такое становішча — у мінулым, заявіў Сяргей Рабкоў.

На думку дыпламата, у сітуацыі, калі НАТА цягам апошніх дзесяцігоддзяў спрабуе «адціснуць» Маскву і перамясціць яе на другія ролі ў міжнароднай палітыцы, высоўваць у яе бок нейкія патрабаванні аб саступках недапушчальна.

«Больш не атрымаецца. Гэта ўсё ў мінулым. І раней не вельмі атрымлівалася, а цяпер гэтаму проста пакладзены канец <…> Так што НАТА трэба збіраць манаткі і адпраўляцца на рубяжы 1997 года», — распавёў Рабкоў.

«Расія доўга запрагала, але цяпер чакае, што адкажа фурман на той павозцы»

Ну а нядаўна Лаўроў вельмі яскрава і алегарчна апісаў адносіны Расіі і НАТА.

«Нашаму цярпенню прыйшоў канец. Мы вельмі цярплівыя. Але вы ведаеце ж, што мы доўга запрагаем? Вось запрагалі мы вельмі доўга, час нам ужо ехаць. Вось чакаем, калі фурман на той павозцы адкажа канкрэтна на нашы прапановы», — сказаў ён.

Чытайце таксама: «Мы восьмы год ваюем і прывыклі». Што ва Украіне думаюць пра магчымае расійскае і беларускае ўварванне?

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру