3-га студзеня суддзя Міхаіл Макарэвіч разглядаў іх справы. Ніхто з іх сваю віну на судзе не прызнаў, паведамляюць праваабаронцы.
Па пратаколе, яны «пікетавалі шляхам запуску піратэхнічнага вырабу (феерверку), згодна з раней размешчанымі ў дэструктыўных тэлеграм-каналах заклікамі».
Сведка-міліцыянт на судзе распавёў, што асабіста назіраў за запускам салюту. Ён сцвярджае, што салют быў у бела-чырвона-белых колерах, а пасля запуску Мікалай і Алена выкрыквалі «правакацыйныя лозунгі». Падставаў сумнявацца ў дакладнасці тлумачэнняў міліцыянта суд не знайшоў.
Акрамя гэтага, доказам віны стала і «падпіска на дэструктыўныя тг-каналы, са зместам якіх яны ўвесь час знаёміліся».
Мікалай на судзе патлумачыў, што салют быў на сто залпаў і запусціў ён яго «выключна па асабістых меркаваннях», бо ў 2020 годзе адбываў суткі па «народным» артыкуле 23.34 КаАП. Але ён адзначыў, што яны з жонкай аніякіх лозунгаў не выкрыквалі і пікетавання не праводзілі.
На думку суддзі Макарэвіча, запуск салюту ў 23:34, яго колер, а таксама лозунгі ў грамадскім месцы сведчаць менавіта пра палітычны характар дзеянняў Мікалая і Алены.
Вынікам суда стаў арышт Мікалая на 15 сутак, а Алены — на 13.
