Сярод першых краін, якія раздавалі грошы вакцынаваным, была Сербія. За прышчэпкі там давалі па 25 еўра.
У ЗША Джо Байдэн прапанаваў штатам, каб людзям выплачвалі па 100 даляраў за вакцынацыю. Але розныя штаты распрацоўвалі і ўласныя праграмы стымулявання вакцынацыі.
Напрыклад, у штаце Мэрыленд сярод вакцынаваных разыгрывалі латарэю з прызам 400 000 даляраў. У штаце Мэн людзям раздавалі бясплатныя ліцэнзіі на рыбалку і квіткі на бейсбол.
Штат Вашынгтон прапаноўваў бясплатны канабіс вакцынаваным асобам, старэйшым за 21 года. У Нью-Ёрку разыгрывалі латарэю з максімальным прызам 5 мільёнаў даляраў. Штат Агая праводзіў штотыднёвую латарэю, у рамках якой аднаму шчасліваму вакцынаванаму жыхару давалі 1 мільён даляраў. Сярод непаўналетніх разыгрываюць стыпендыі на навучанне ва ўніверсітэце. У Каліфорніі на выплаты вакцынаваным патрацілі 116,5 млн даляраў.
Латарэі разыгрывалі і ў канадскіх рэгіёнах. Напрыклад, у Квебеку разыгрывалі 2 мільёны даляраў, сярод якіх — галоўны прыз 1 мільён.
Падобныя латарэі праводзяцца і ў Камбоджы.
У Ганконгу ўрад папрасіў прыватныя кампаніі разыграць прызы сярод вакцынаваных. Бясплатныя кватэры коштам 1,4 млн даляраў, прыватныя вечарынкі на самалёце A321neo, аўтамабілі Tesla, айфоны, безлімітныя «шведскія сталы», залатыя зліткі і гэтак далей.
У Брытаніі моладзі за вакцыны прапаноўвалі бясплатныя паездкі на Uber і Bolt, квіткі ў кіно і дастаўку фаст-фуда. У сталіцы, Лондане, разыгрывалі квіткі на футбольны чэмпіянат Еўропы.
У Грэцыі моладзі раздавалі ваўчары на 150 еўра за першую дозу. Купоны можна выкарыстаць для падарожжаў, пражывання ў гатэлях або кемпінгах, наведвання канцэртаў, кінатэатраў і аплаты квіткоў на іншыя культурныя мерапрыемствы.
У Германіі ў некаторых гарадах у цэнтрах вакцынацыі раздаюць бясплатныя сасіскі. А ў Берліне ў цэнтрах вакцынацыі адбываюцца сапраўдныя рэйвы з дыджэямі.
У Румыніі вакцынаваным прапаноўвалі бясплатныя кебабы, а кніжны магазін раздаваў бясплатныя кнігі і каву.
У Маскве сярод вакцынаваных разыгрывалі пяць аўтамабіляў штотыдзень.
У Нідэрландах людзей пасля прышчэпкі частавалі марынаваным селядцом — мясцовым традыцыйным далікатэсам.
У аўстралійскім Мельбурне кінатэатры прапаноўвалі вакцынаваным бясплатны папкорн і чыпсы.
У адным з тайландскіх сельскагаспадарчых рэгіёнаў разыгрывалі 27 кароў — такім спосабам вакцынавалі палову насельніцтва. У Інданезіі робяць падобныя латарэі, але з куранятамі. Многія інданезійцы баяліся рабіць прышчэпкі: у мусульманскай краіне не ўсе былі ўпэўненыя ў іхняй халяльнасці.
У Ліване Uber прапаноўваў дзве бясплатныя паездкі у адзін з цэнтраў вакцынацыі і назад.
Нестандартныя меры для стымулявання вакцынацыі ажыццяўлялі і ў Кітаі. У розных рэгіёнах людзям давалі купоны на пакупкі і прадуктовыя ваўчары, курыныя крыльцы, сурвэткі, муку, грашовыя прызы і бясплатны ўваход у паркі.
У Балгарыі пенсіянерам 6 месяцаў пасля другой дозы даплачвалі да асноўнай пенсіі 43 даляры.
На ўскраіне сталіцы Філіпін Манілы сярод вакцынаваных разыгрывалі 25-кілаграмовы мяшок рысу. Ініцыятыва накіраваная на прыцягненне бяднейшых жыхароў, якім неабходны дадатковы штуршок для вакцынацыі.
У Індыі McDonald's прапаноўваў вакцынаваным кліентам зніжку 20%.
Ювеліры ў штаце Гуджарат выдавалі вакцынаваным жанчынам залатыя шпількі для носа.
Узнагарода ў абмен на прышчэпку можа здавацца дзіўнай ідэяй, але некаторыя медыцынскія даследчыкі лічаць, што такія стымулы могуць быць эфектыўным спосабам.
У артыкуле, апублікаваным у медыцынскім часопісе The New England Journal of Medicine, даследчыкі сцвярджаюць, што «існуе пэўная логіка ў прадастаўленні фінансавых стымулаў, якія могуць быць выкарыстаны для кампенсацыі ўскосных выдаткаў на вакцынацыю, уключаючы час, выдаткаваны на планаванне сустрэч ці паездкі; для кампенсацыі страчанага даходу для работнікаў з пагадзіннай працай».
Гэтыя выдаткі непрапарцыйна стрымліваюць людзей з нізкім узроўнем даходу ад вакцынацыі, і выплаты могуць гэта выправіць.
Паводле апытання Каліфарнійскага ўніверсітэта ў Лос-Анджэлесе, каля траціны непрышчэпленых амерыканцаў заявілі, што гатовыя вакцынавацца ў абмен на 100 даляраў.
Матывуюць людзей і латарэі. Людзей прыцягваюць вялікія лічбы, і людзі не ўмеюць адэкватна ацэньваць шанцы.
Крытыкі мяркуюць, што самі па сабе такія ініцыятывы наўрад ці дапамогуць дасягнуць высокага ўзроўню вакцынацыі. Халява і фінансавыя стымулы, імаверна, спрацуюць для пэўных груп, якія вагаюцца і раней ўжо думалі пра вакцынацыю. Аднак у груп насельніцтва, прынцыпова настроеных супраць вакцынацыі, зацятых скептыкаў, фінансавыя стымулы могуць выклікаць лішнія падазрэнні і ўзмацніць асцярогі.
Гэтыя праграмы таксама не ліквідуюць пастаянныя прабелы ў інфармацыі і асвеце, праз якія некаторыя маргінальныя групы насельніцтва адмаўляюцца рабіць прышчэпкі.
Чытайце таксама: «Столькі не было ніколі». У паліклініках робіцца нешта неймавернае, такі наплыў кавідных пацыентаў
