Юрый Горбіч, скрыншот відэа брыфінгу Мінздароўя
«Калі мы гаворым пра масачны рэжым, то гэтая тэма мусіруецца каторы раз, то наша пазіцыя абсалютна адназначная і гучыць так: у сітуацыі, калі ідзе распаўсюджванне віруса, які з'яўляецца абсалютна заразным, а «амікрон» адзначна высоказаразны, то з гледзішча адказнага чалавека, так, маскі мы носім па адной простай прычыне — гэта змяншае небяспеку мне, як чалавеку, які можа служыць крыніцай заражэння для навакольных. У меншай ступені абараняе мяне, чым навакольных.
І зразумела, калі мякка адносімся, прабачце за гэта слова, па-наплявацельску, да навакольных, ніякім чынам не думаем пра навакольных людзей — родных, блізкіх, якія адносяцца да катэгорый рызыкі, то так, можна не насіць маскі.
Але па-мойму, у нашай краіне, зроблена ўсё, каб людзям пра гэта нагадаць. Нават пры ўваходзе туды, дзе мы знаходзімся (Белпрэсцэнтр), вісіць просьба аб неабходнасці насіць маску. Па-мойму, гэтая просьба вісіць пры ўваходзе ў любую краму, калі не падводзіць памяць».
Што да мераў да тых людзей, што не носяць маскі, то Юрый Горбіч адказаў:
«Як зрабіць больш жорстка (меры)? Прымушаць, саджаць, кнутом біць? Розгамі? З майго гледзішча, людзі, якія ў стане разумець, несці адказнасць, на мой погляд, людзі, якія жывуць у Рэспубліцы Беларусь, маюць высокі ўзровень ай-к'ю і высокі ўзровень развіцця, яны разумеюць, што гэта трэба. Усім астатнім, якім напляваць на навакольных, то, на жаль, мы нічога тут не зробім», — рэзюмаваў спецыяліст.
Нагадаем, што ў кастрычніку ў краіне пачалася абсурдная, насуперак сусветнаму досведу, барацьба з заклікамі насіць маскі: налепкі з такой рэкамендацыяй паздымалі з грамадскага транспарту, гандлёвых цэнтраў, іншых публічных месцаў.
З санітарных норм і правілаў, якія тычыліся супрацьдзеяння кавіду, выключаны пункт, што ўступіў у сілу з 9 кастрычніка, які абавязваў фізічных асоб пры наведванні аб'ектаў, арганізацый насіць маску і прытрымлівацца сацыяльнай дыстанцыі. Тое ж тычылася пасажыраў грамадскага транспарту.
Адбылося гэта пасля заяваў галоўнага кавід-дысідэнта краіны. На нарадзе Лукашэнка раскрытыкаваў міністраў аховы здароўя і ўнутраных спраў за прымус і кантроль за абавязковым нашэннем масак. «Вам што, няма чым займацца? — спытаў ён у Кубракова. — Вы чаму закон парушаеце? У нас няма закона такога… Бачыце, людзей яны пачалі штрафаваць. Хто вам даў права на гэта?»
Варта зазначыць, што нядаўна Лукашэнка заявіў, што другі раз перахварэў на «карону», цяпер ужо якраз на «амікрон». Ён выказаўся, што падтрымлівае нейкага вучонага, які прапанаваў, каб усе перахварэлі на «амікрон», і гэта «будзе як вакцына для нас». «З майго пункту гледжання — ідэальная прапанова», — сказаў два тыдні таму Лукашэнка.
Пры гэтым сам Лукашэнка хваробу перанёс на нагах, працягваў праводзіць сустрэчы і мерапрыемствы, людзі на іх былі без масак.
Чытайце таксама:
«Так, распараджэнне адміністрацыі прыйшло». У Мінску масава здымаюць аб'явы пра масачны рэжым
У «Мінсктрансе» патлумачылі, чаму прыбралі налепкі пра масачны рэжым
Катастрофа ў паліклініках. Гіганцкія чэргі на чатыры-шэсць гадзін, сотні людзей у калідорах
