У Жабінкаўскім раёне ў выніку падзення кола трактара загінула пяцігадовае дзіця.
Як паведамілі БелаПАН у пракуратуры Жабінкаўскага раёна, трагедыя адбылася 8 жніўня прыблізна ў 17.00 у двары прыватнага дома ў вёсцы Старое Сяло.
Гаспадар збіраўся напампаваць запасное кола свайго «Беларуса» (вышыня кола — больш за 1,5 метра) і прыхіліў яго да трактара. Кола ўпала на дзіця, якое гуляла побач, і прыціснула яго. Хлопчык памёр на месцы. Цела дзіцяці знайшлі сваякі.
Прычыну смерці выявіць судова‑медыцынская экспертыза. Праверку праводзіць пракуратура Жабінкаўскага раёна.
