Фота: zarya.by

Нарадзілася неданошанай і змагалася з хваробамі

Гуськовай 29 гадоў. Будучая чэмпіёнка родам з Мінска, прычым, нарадзілася яна шасцімесячнай, з вагой 1,55 кілаграма. Праз гэта, як сведчыла сама дзяўчына, у дзяцінстве яна часта мела праблемы са здароўем: прыходзілася ляжаць пад кіслароднай маскай, нават неяк спынялася сэрца, але ж медыкі дапамаглі ўстаць на ногі.

Ганна ў спорце з самага дзяцінства. Пачынала з мастацкай гімнастыкі, куды патрапіла яшчэ ў дзіцячым садку.

А калі Гуськовай споўнілася сем, надышоў час фрыстайла: сябар сям’і, Уладзімір Дашчынскі (бацька аднаго з трэнераў зборнай Дзмітрыя Дашчынскага), параіў паспрабаваць дзяўчынку ў гэтай дысцыпліне. Разам з ім і іншым трэнерам, Юрыем Купрацэвічам, Гуськова і пачынала свой шлях у гэтым відзе спорта.

Цікава, што пазней яна неаднаразова казала: на той момант ніхто і не пытаўся, ці хочацца ёй самой займацца фрыстайлам. Ганна ўспамінае, што, калі была маленькай, часам не надта хацела хадзіць на трэніроўкі. Але, калі дабралася да сур’ёзных стартаў, нарэшце адчула азарт да новых дасягненняў.

Гэтае і астатнія фота: anita_guskova / Instagram.

У 2005 годзе Гуськова трапіла ў дарослую зборную краіны, а ў трынаццаць гадоў выступіла на першым сур’ёзным турніры — адкрытым чэмпіянаце Расіі. Потым пайшлі кубкі Еўропы і свету, а пазней з’явіліся і першыя медалі: у 2012 годзе на юніёрскім чэмпіянаце свету Гуськова ўзяла срэбра.

Перад першай Алімпіядай страціла бацьку

Незадоўга да сваіх першых Гульняў у Сочы-2014 Гуськова перанесла аперацыю на калене, пасля якой не здолела на той час цалкам аднавіцца. Гэта адбілася на выніках: юная беларуска не ўтрымалася на нагах пасля скачка і аказалася на той Алімпіядзе толькі 21-й.

За год да гэтага ў жыцці спартсменкі здарылася яшчэ адна драма — Гуськова страціла бацьку. Той перыяд яна згадвае як вельмі цёмны.

Але далей у Ганны нібыта пачалася светлая паласа: у студзені 2015 года Гуськова ўзяла свой першы медаль — бронзу, на Кубку свету па фрыстайле. Але ж зноў пачаліся праблемы са здароўем: пашкоджанне меніска, разрыў крыжападобнай звязкі на правым калене і далейшыя аперацыі прывялі да таго, што ў калене спартсменкі з’явіліся дзве тытанавыя шрубы.

Аднаўляцца прыйшлося доўга, Гуськова цалкам прапусціла сезон 2016/2017. А калі вярнулася, узяла па выніках другое месца ў заліку Кубка свету.

У 2018 годзе эксперты не бачылі ў Гуськовай прэтэндэнтку на алімпійскі медаль. Але сама Ганна рыхтавалася да сур’ёзнай барацьбы і выбрала для выступу складаную праграму. Падчас прызямлення фрыстайлістка дакранулася рукой да снегу. Аднак гэта не перашкодзіла ёй стаць чэмпіёнкай: срэбраная медалістка Пхёнчхана Чжан Сінь адстала ад Гуськовай на 0,62 бала.

Пасля алімпійскага золата зноў пакутавала ад траўмы

Пасля той Алімпіяды Ганна зноў прапусціла сезон: падвяло калена. У лютым 2020-га, на апошнім перад пандэміяй этапе Кубка свету, Гуськова ўзяла золата, чым адзначыла сваё вяртанне ў спорт.

Букмекеры не надта верылі ў поспех Гуськовай ды і іншых беларускіх фрыстайлістаў у Пекіне. Напрыклад, брытанская фірма bet365 ацэньвала шансы Ганны на чэмпіёнства з каэфіцыентам 13, ёй прадракалі месца, не вышэйшае за шостае.

Магчыма, на чаканні кантор уплывала і тое, што сёлетняя Алімпіяда — першыя за доўгі час Гульні, дзе беларусам не дапамагае Мікалай Казека, шматгадовы зорны трэнер нашай зборнай па фрыстайле.

У цяжкі час не хавала сваю грамадзянскую пазіцыю

Летам 2020 года Ганна, як і шмат хто з яе калег са зборнай па фрыстайле, падпісала ліст спартоўцаў за сумленныя выбары.

Пазней іншы падпісант гэтага ліста, трэнер Мікалай Казека, трапіў пад прэсінг з боку уладаў за сваю грамадзянскую пазіцыю.

Тады спартоўцы беларускай зборнай па фрыстайле склалі і падпісалі адкрыты ліст у падтрымку свайго трэнера. Подпіс Гуськовай пад ім таксама стаіць.

Варта адзначыць, што да такой пазіцыі Ганна прыйшла не адразу. Так, у 2019 годзе ў адказ на пытанне пра тое, як яна ставіцца да Лукашэнкі як да кіраўніка Беларусі, Гуськова адказвала: «У нашай краіне мяне шмат што задавальняе».

Што да цікаўнасцей, то Гуськова мае некалькі татуіровак. Сярод іх — пума, кветка з пяром і надпіс на латыні, які перакладаецца як «імкнуцца ўверх».

Ганна — фанатка рок-музыкі і нават хацела, калі ёй было 16, стварыць з сябрамі рок-гурт. У 2015 годзе, калі ў Мінск прыязджаў амерыканскі калектыў 30 seconds to Mars, Гуськова забралася падчас канцэрта на сцэну і апынулася ў некалькіх метрах ад фронтмэна гурта Джарэда Лета.

Клас
1
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру