Паводле інфармацыі Міжнароднага агенцтва па атамнай энергіі (МАГАТЭ), з таго часу, як 24 лютага расійскія войскі захапілі Чарнобыльскую АЭС, сітуацыя на ёй пагаршаецца. Кіраўнік агенцтва Рафаэль Гросі заявіў у аўторак, 8 сакавіка, што, па даных украінскага боку, каля 210 тэхнікаў і мясцовых супрацоўнікаў службы бяспекі дзяжурылі на атамнай электрастанцыі бесперапынна на працягу амаль двух тыдняў, паколькі пад расійскім кантролем не адбывалася змена персаналу.
Па паведамленні ўкраінскага рэгулятара, яны атрымліваюць ваду, ежу і медыкаменты ў абмежаваным аб'ёме, і іх становішча пагаршаецца.
Акрамя таго, МАГАТЭ больш не мае сувязі са сваім маніторынгавым абсталяваннем, якое гарантуе, што ўсе ядзерныя матэрыялы знаходзяцца на сваіх месцах.
«Я глыбока занепакоены складанай і стрэсавай сітуацыяй, у якой аказаўся персанал Чарнобыльскай атамнай электрастанцыі, і патэнцыйнымі рызыкамі для ядзернай бяспекі, якія гэта цягне за сабой», — заявіў кіраўнік МАГАТЭ.
Рафаэль Гросі прапанаваў правесці перамовы аб гарантыях бяспекі ўкраінскіх ядзерных абʼектаў з удзелам прадстаўнікоў Расіі і Украіны на тэрыторыі АЭС ці ў іншым месцы.
На гэты момант ад расійскага ўварвання пацярпела яшчэ адна АЭС — Запарожская — і некаторыя іншыя абʼекты з запасамі ядзерных матэрыялаў. Аднак уцечкі радыеактыўных рэчываў не адбылося.
У 1986 годзе на Чарнобыльскай АЭС здарылася разбуральная ядзерная аварыя. Радыеактыўныя адходы захоўваюцца там і сёння.
