Дысклэймер: У некаторых песнях ёсць нецэнзурная лексіка і абразы. Гэта непрывабны, але натуральны бок вайны.

PROBASS ∆ HARDI — «ДОБРОГО ВЕЧОРА» (WHERE ARE YOU FROM?)

Трэк з культавай фразай «Доброго вечора, ми з України» з'явіўся ў кастрычніку мінулага года. Яго стваральнікі — DJ ProBass (Арцём Ткачэнка) і DJ Hardi (Максім Макрэнка) з Краменчуга. Саму фразу ўзялі з інтэрв'ю Марка Галаневіча, вакаліста папулярнага ўкраінскага гурта «ДахаБраха».

Да вайны песня стала папулярнай у Тыктоку, а статус культавай набыла пасля ратацыі ў тэлемарафоне ўкраінскіх тэлеканалаў і ваенных відэазваротах кіраўніка Мікалаеўскай вобласці Віталя Кіма.

«Ён што, тую бомбу на ровары вязе?» Вялікая падборка мемаў і тыктокаў пра вайну ва Украіне

Макс Барскіх — «Буде весна»

Папулярны поп-спявак спачатку змагаўся на інфармацыйным фронце, забараніўшы выконваць і інакш выкарыстоўваць свае песні на тэрыторыі Расіі, а таксама запісваючы эмацыйныя звароты да сваіх калег з Расіі. 

На мінулым тыдні Барскіх апублікаваў фота ў вайсковай форме і заявіў, што далучыўся да УСУ.

Kalush Orchestra — Stefania

Песня, якая прадставіць Украіну на «Еўрабачанні», і стала саўндтрэкам тысяч тыкток-відэа пра гераізм украінцаў.

Stefania прысвечаная маці лірычнага героя і прыемным успамінам пра яе.

Kalush — «Додому»

Леташняя песня пра сум па родных мясцінах набыла новы сэнс пасля пачатку вайны: у каментарыях да відэа людзі пішуць, што слухаюць гэтую песню ў акопах ці ў вымушанай эміграцыі. І ўсе спадзяюцца, што хутка вернуцца дадому.

Сяргей Бабкін — «Я солдат» (2022)

Удзельнік 5'nizza праз 20 гадоў пераспяваў галоўны хіт гурта. Цяпер ён не пра страшную бессэнсоўнасць вайны, а пра гераічнае змаганне ўкраінцаў супраць Расіі.

«Беларусам будзе вельмі сорамна ды горка за тое, што яны не здолелі нічога зрабіць». Гутарка з музыкам Сяргеем Бабкіным

Тарас Баравок — «Байрактар»

Вайна ўзбагаціла ўкраінскую мову назвамі заходняга ўзбраення. У гонар амерыканскага супрацьтанкавага комплекса «Джавелін» нават называюць дзяцей.

А суперэфектыўным турэцкім беспілотнікам прысвячаюць песні.

Андрэй Хлыўнюк & The Kiffness — «Ой у лузi червона калина»

У першыя дні вайны лідар «Бумбокса», які далучыўся да тэрабароны, заспяваў вядомы марш сечавых стральцоў на пустой Сафійскай плошчы Кіева. 

Гэтая песня ў савецкі час была забароненая за яе радкі пра вызваленне братоў-украінцаў ад маскоўскіх кайданаў. Яе зноў сталі выконваць у канцы 1980-х.

Відэаблогер і дыджэй з Паўднёва-Афрыканскай Рэспублікі The Kiffness зрабіў рэмікс на спеў Хлыўнюка. На пачатак красавіка ў яго больш за 5 мільёнаў праглядаў.

Спеў фронтмэна «Бумбокса» выкарысталі легендарныя Pink Floyd, каб запісаць свой першы з 1994 года сумесны трэк.

Хрысціна Салавей — «Українська лють»

Папулярная спявачка зрабіла сваю версію песні італьянскіх партызанаў. Другую хвалю папулярнасці набыла і іншая песня Хрысціны Салавей — «Тримай».

Руся — «Заручена» («Не стiй пiд вiкном»)

Песня 1989 года з першага поп-альбома на ўкраінскай мове спявачкі Русі стала саўндтрэкам для мемаў з расійскім палонным вайскоўцам Андрэем Разанцавым.

Фота стала мемам — на ім вайсковец выглядае малым і несамавітым, яму нават прыдумалі мянушку Чмоня. 

На відэа Разанцава ўстаўляюць у розныя жыццёвыя сітуацыі, часцей за ўсё пад песню Русі. Таксама тыктокеры апранаюцца «ў стылі Чмоні» і запісваюць такія ролікі.

Jockii Druce — «Шо ви браття»

Украінскі рэпер jockii druce праз сваю песню звярнуўся да ўкраінцаў. Калі каротка і без мацюкоў: украінцам, нягледзячы на ​​вайну, не варта засмучацца, а трэба ўзяць сябе ў рукі і таксама памятаць, што прыгажосць украінцаў — гэта галоўная сіла.

KAZKA — I am not OK 

У гурта KAZKA выйшла песня пра тое, праз што даводзіцца праходзіць цяпер украінцам у іх барацьбе з расійскімі захопнікамі.

Відэа пачынаецца з вою сірэн, які лунае па ўсёй краіне, таксама дэманструюцца кадры выбухаў і наступстваў ракетных удараў.

Travinskiy — «Душу й тіло»

Спявак Багдан Стравінскі пераасэнсаваў радкі гімна Украіны і зрабіў кранальны хіт.

MC PAPA — VOVA ї**sh їх Bl**d' 

Крык душы адыёзнага прэзідэнта футбольнага клуба «Інгулец» Аляксандра Паваразнюка, якім ён заклікае Уладзіміра Зяленскага біць ворагаў, быў пакладзены на электронную музыку. 

Некаторыя фразы Паваразнюка сталі народнымі.

«Один в каное» — «У мене немає дому»

Гэта галоўны хіт украінскага гурта, які праз тры гады пасля рэлізу зноў стаў вельмі актуальным. У кліпе хлопчык праз непаразуменне з бацькамі сыходзіць з дому, каб вандраваць са сваімі ўяўнымі сябрамі. Але нават у фантастычных істот ёсць свой дом, у які яны вяртаюцца, а ўсё падарожжа — гэта замкнёнае кола, якое рана ці позна зноў прыводзіць усіх дадому.

Бонус. Cypis — Putin

Польскі рэпер стаў вядомым дзякуючы песні пра наркотыкі, якая стала саўндтрэкам мема пра карову, якая танцуе. Пасля пачатку вайны ва Украіне Cypis запісаў песню, у якой выказаўся пра прэзідэнта Расіі. Тэкст прыводзіць не будзем.

KSLV — Disaster

У Тыктоку можна знайсці тысячы відэа працы Узброеных сіл Украіны пад гэты хіт сацсетак.

@yankee.in Попросили с парнями сказать слово Паляниця . Уничтожено 9 БМП и 2 танка! 2 танка и 2 БМП взяты на вооружение Украины. #славаукраїні #жывебеларусь #смертьворогам #украина ♬ Disaster - KSLV Noh

Біяграфія музыканта з'яўляецца таямніцай, нешта знайсці пра яго вельмі складана.

Demi Lovato — Cool for the Summer (TikTok Remix)

Яшчэ адзін хіт Тыктока. Пад гэтую песню Аляксей Арастовіч аб'яўляе аб адбоі паветранай трывогі, а Віталь Кім — танцуе пад словы «Все буде добре!».

Каб было зручна слухаць, сабралі ўсе песні ў адзін плэй-ліст. 

Клас
33
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?