Беларусь аб’явіць аб сваім рашэнні наконт прадаўжэння мандата Офіса АБСЕ ў Мінску падчас пасяджэння Пастаяннага савета АБСЕ ў Вене 17 снежня.
Пра гэта паведаміў намеснік міністра замежных спраў Беларусі Валерый Варанецкі.
Паводле яго слоў, «гэта пытанне разглядаецца і яшчэ не пастаўлена кропка».
«Беларусь зацікаўлена ў канструктыўным супрацоўніцтве з офісам АБСЕ. Я з аптымізмам гляджу на будучыню нашага ўзаемадзеяння з гэтым офісам», — заявіў Варанецкі.
2 верасня кіраўнік Адміністрацыі прэзідэнта Беларусі Уладзімір Макей сказаў, што «беларускі бок змушаны сур’ёзна задумацца над перспектывамі далейшай дзейнасці Офіса АБСЕ ў Мінску, у тым ліку ў дачыненні да прызначэння яго новага кіраўніка». «Тым больш што аб’ектыўных падстаў для існавання палявой прысутнасці АБСЕ ў Беларусі няма», — адзначыў Макей.
Офіс АБСЕ ў Мінску быў адкрыты 1 студзеня 2003 года. Мандат офіса АБСЕ дзейнічае на працягу года і можа быць прадоўжаны са згоды беларускага ўрада.
