Мінэканомікі захавала рознічныя цэны на гарэлку і тытунь на ранейшым узроўні.
Як паведаміла прэс‑служба міністэрства, у сувязі са зменай падатковага заканадаўства і адменай падатку з продажу тавараў у рознічным гандлі прыняты пастановы, якімі прадугледжана ўнясенне адпаведных змен у рэдакцыю рознічных прэйскурантаў на гарэлку і тытунёвыя вырабы. Згодна з гэтымі рашэннямі, цэны засталіся на ранейшым узроўні.
Як зазначылі ў міністэрстве, гэта дазволіць з улікам адмены шэрагу падаткаў часткова кампенсаваць рост акцызу і павялічыць разліковую адпускную цану на гарэлку і тытунёвыя вырабы для арганізацый‑вытворцаў.
Пастановы Міністэрства эканомікі ўведзены ў дзеянне 6 і 7 студзеня 2010 года.
Апошняе павышэнне цэн на гарэлку і тытунь адбылося 19 снежня 2009 года. Цэны на гарэлку і іншыя віды алкагольнай прадукцыі мацункам звыш 28% былі павялічаны ў сярэднім на 5%.
Апрача таго, рознічныя цэны былі павышаны на цыгарэты, што вырабляюцца ў Беларусі па праграме імпартазамяшчэння (Pall Mall і Pall Mall Superslims), а таксама на імпартаваныя — Glamour (Pinks, Menthol), Sobranie (Black Russian, Cocktail) і R1 — «на ўзроўні, прапанаваным вытворцамі і імпарцёрам».
