Міжнародны спадарожнікавы тэлеканал «Беларусь‑ТБ» адзначыў пяцігоддзе.
Як паведаміў на прэс‑канферэнцыі 1 лютага ў Мінску кіраўнік тэлеканала Валерый Радуцкі, дзяржаўны некамерцыйны тэлеканал «Беларусь‑ТБ» пачаў сваё вяшчанне 1 лютага 2005 года
з мэтай падтрымання інфармацыйнай сувязі этнічных беларусаў з гістарычнай радзімай.
Паводле яго слоў, на гэты час тэлеканал заключыў 276 дагавораў з аператарамі кабельнага тэлебачання, прычым 195 з іх — у Расіі.
Для трансляцыі праграм тэлеканала выкарыстоўваюцца два спадарожнікі, і патэнцыяльная аўдыторыя «Беларусь‑ТБ» у 15 краінах складае прыкладна 220 млн. гледачоў. Беларускі тэлеканал транслюецца ў Расіі, Малдове, ва Украіне, у Літве, Латвіі, Эстоніі, Казахстане, ЗША, Аўстраліі і іншых краінах. Як растлумачыў Радуцкі, дакладна разлічыць колькасць сваёй глядацкай аўдыторыі сёння не можа ніводзін спадарожнікавы тэлеканал.
У далейшых планах канала «Беларусь‑ТБ» — працягваць працу па пашырэнні вяшчання у замежных краінах.
Плануецца наладзіць супрацоўніцтва з кабельнымі аператарамі Кітая, Індыі і іншых краін.
Паводле слоў Радуцкага, найбольшай папулярнасцю ў гледачоў беларускага спадарожнікавага тэлеканала карыстаюцца савецкія кінафільмы, музычныя праграмы і праграмы навінаў. У далейшым «Беларусь‑ТБ» плануе пашыраць выпуск праграм уласнай вытворчасці ў дапаўненне да ўжо існых праектаў «У нашым доме, у нашай хаце», «Працадзень», якія расказваюць пра жыццё беларускіх людзей і прадпрыемстваў. Апрача таго, у будучым праграмы тэлеканала будуць дапоўнены англамоўным бягучым радком.
